இந்தியாவை 2047-ஆம் ஆண்டிற்குள் முழுமையான வல்லரசு நாடாக மாற்றும் மத்திய அரசின் தொலைநோக்குத் திட்டத்தின் ஒரு பகுதியாக, நாடு முழுவதும் உள்ள மத்திய பொதுத்துறை நிறுவனங்களில் காலியாக இருந்த 61,000-க்கும் மேற்பட்ட பணியிடங்களுக்குத் தேர்வு செய்யப்பட்ட இளைஞர்களுக்குப் பணி ஆணைகள் வழங்கும் ‘வேலைவாய்ப்புத் திருவிழா’ (Rozgar Mela) மிகச் சிறப்பாக நடைபெற்றது. டெல்லியில் நடைபெற்ற பிரதான நிகழ்வில் பிரதமர் நரேந்திர மோடி அவர்கள் காணொளி காட்சி வாயிலாகப் பங்கேற்றுப் புதிய பணியாளர்களுக்குப் பணி ஆணைகளை வழங்கி வாழ்த்தினார். இதன் தொடர்ச்சியாக, திருவள்ளூர் மாவட்டம் ஆவடியில் உள்ள சி.ஆர்.பி.எஃப் (CRPF) குரூப் மையத்தில் நடைபெற்ற விழாவில் மத்திய இணை அமைச்சர் எல்.முருகன் கலந்துகொண்டு, உள்துறை, பாதுகாப்புத் துறை மற்றும் பல்வேறு பொதுத்துறை நிறுவனங்களுக்குத் தேர்வு செய்யப்பட்ட 328 பணியாளர்களுக்குப் பணி ஆணைகளை நேரில் வழங்கிச் சிறப்பித்தார்.
நிகழ்ச்சியில் மேடையில் உரையாற்றிய மத்திய இணை அமைச்சர் எல்.முருகன், புதிய பணியாளர்களின் கரங்களில் இந்தியாவின் எதிர்காலம் இருப்பதைச் சுட்டிக்காட்டினார். “2047-ஆம் ஆண்டில் இந்தியா வல்லரசாக உருவெடுக்கும் இலக்கை அடைய, தற்போது அரசுப் பணியில் இணையும் இளைஞர்கள் அர்ப்பணிப்புடன் உழைக்க வேண்டும். கடந்த 2010-ஆம் ஆண்டிற்கு முன்பு, உலகப் பொருளாதார வரிசையில் இந்தியாவின் இடம் எங்கே இருக்கிறது என்பதைத் தேட வேண்டிய அவலநிலை இருந்தது. ஆனால், 2011-க்குப் பிறகு நாம் கண்டுள்ள அசுர வளர்ச்சி, இன்று உலகப் பொருளாதாரத்தில் இந்தியாவை நான்காவது பெரிய நாடாக உயர்த்தியுள்ளது. இதே வேகத்தில் பயணித்தால், 2047-ஆம் ஆண்டு பொருளாதார வளர்ச்சியில் உலகிலேயே முதல் நாடாக இந்தியா கம்பீரமாக நிற்கும்” என்று அவர் நம்பிக்கையுடன் தெரிவித்தார்.
இந்தியாவின் தொழில்நுட்பம் மற்றும் பாதுகாப்புத் துறையின் வலிமை குறித்துப் பேசிய அமைச்சர், ‘ஆபரேஷன் சிந்தூர்’ போன்ற திட்டங்கள் மூலம் எல்லை தாண்டாமலே நாம் நமது பாதுகாப்பையும் வெற்றியையும் உறுதி செய்துள்ளோம் என்றும், இதன் காரணமாக இன்று உலக நாடுகள் அனைத்தும் இந்தியாவை மிகுந்த வியப்புடனும் மரியாதையுடனும் உற்று நோக்குகின்றன என்றும் குறிப்பிட்டார். உள்கட்டமைப்பு மற்றும் விளையாட்டுத் துறையிலும் இந்தியா புதிய உச்சங்களைத் தொட்டு வருவதைச் சுட்டிக்காட்டிய அவர், 2037-ஆம் ஆண்டு ஒலிம்பிக் போட்டிகளை நமது நாட்டில் நடத்துவதற்கான முன்னேற்பாடுகள் தீவிரமாக நடைபெற்று வருவதாகவும் தெரிவித்தார். டிஜிட்டல் பரிவர்த்தனை முதல் விண்வெளி ஆய்வு வரை இந்தியா படைத்து வரும் சாதனைகள், புதிய பாரதத்தின் எழுச்சியை உறுதிப்படுத்துவதாக அமைந்தது அமைச்சரின் உரை. இந்நிகழ்வில் உயர் அதிகாரிகள், புதிய பணியாளர்கள் மற்றும் அவர்களது குடும்பத்தினர் திரளாகக் கலந்துகொண்டு விழாவினைச் சிறப்பித்தனர்.