மறைந்த முன்னாள் முதல்வர் காமராஜரின் பிறந்த நாள் ஜூலை 15-ம் தேதி கொண்டாடப்பட்டது. கல்விக்கண்திறந்தவையாகத் திகழ்ந்த அவர், மதிய உணவுத் திட்டம் மூலம் ஏழை மாணவர்களுக்கு கல்வி வாய்ப்பளித்த பெருந்தலைவர் என நினைவுகூரப்பட்டார்.
இந்தநிலையில், சென்னையில் நடைபெற்ற திமுக பொதுக்கூட்டத்தில் திமுக எம்பி திருச்சி சிவா பேசியது சர்ச்சையை ஏற்படுத்தியது. அதில்,
“காமராஜர் மின்தட்டுப்பாட்டை கண்டித்துப் போராட்டம் நடத்தினார். ஆனால் அவருக்கு ஏசி இல்லையென்றால் அலர்ஜி வந்துவிடும். அதனால் அவர் தங்கும் இடங்களில் குளிர்சாதன வசதி கட்டாயமாக வைத்தார்,” என்றும், “கலைஞரின் பெருந்தன்மையால் நெகிழ்ந்த காமராஜர், இறப்பதற்குள் கருணாநிதியின் கைகளைப் பிடித்து ‘நாட்டையும் ஜனநாயகத்தையும் நீங்கள் காப்பாற்ற வேண்டும்’ என்றார்,” என்றும் தெரிவித்தார்.
இச்சொற்கள் காங்கிரஸ் கட்சியினரிடம் எதிர்வினையை ஏற்படுத்த, அவரிடம் பலரும் கண்டனம் தெரிவித்தனர்.
இதையடுத்து, திருச்சி சிவா விளக்கம் அறிக்கை ஒன்றை வெளியிட்டுள்ளார். அதில் அவர் கூறியதாவது:
“பெருந்தலைவர் காமராசரின் புகழுக்கு களங்கம் விளைவிக்கும் வகையில் நான் பேசியதாக கூறப்படுவது வேதனைக்குரியது. காமராஜர் கல்வி வளர்ச்சிக்காக பாடுபட்டவர். மதிய உணவுத் திட்டம் கொண்டு வந்த முன்னோடி. பல மேடைகளில் நான் அவரைப் பற்றிப் பெருமையுடன் பேசிக்கொண்டே இருக்கிறேன்.” மேலும்,
“அவரது பிறந்த நாளை ‘கல்வி வளர்ச்சி நாள்’ என கடைப்பிடிக்கும் முதலமைச்சர் மு.க. ஸ்டாலினின் தலைமையில் பணியாற்றும் நான், அந்த தலைவரின் புகழுக்கு எப்போதும் மரியாதை செலுத்துவேன். காமராசர் மீது எனக்கு மிகுந்த மதிப்பும் மரியாதையும் உண்டு,”
என தெரிவித்துள்ளார். “நான் கூறிய உரை குறித்து தயவுசெய்து தவறாக புரிந்துகொள்கிற நிலையை விலக்கி, இது மேலும் விவாதப் பொருளாக மாற வேண்டாம்,”
எனவும் திருச்சி சிவா கேட்டுக்கொண்டார்.
