தூத்துக்குடி வ.உ.சிதம்பரனார் துறைமுக ஆணையம், கோவா மாநிலத்தில் கடந்த ஜனவரி 27 முதல் 30-ம் தேதி வரை மிகப்பிரம்மாண்டமாக நடைபெற்ற ‘இந்தியா எரிசக்தி வாரம் 2026’ (India Energy Week 2026) நிகழ்வில் பங்கேற்று, தேசத்தின் சுத்தமான எரிசக்தி மாற்றம் மற்றும் நிலைத்துவமான கட்டமைப்பு வளர்ச்சிக்கான தனது வலுவான உறுதியை உலகிற்கு வெளிப்படுத்தியுள்ளது. மத்திய பெட்ரோலியம் மற்றும் இயற்கை எரிவாயு அமைச்சகத்தின் முழுமையான ஆதரவுடன் நடைபெற்ற இந்தச் சர்வதேச நிகழ்வில், சுற்றுச்சூழல் பாதுகாப்பை அடுத்தகட்டத்திற்கு எடுத்துச் செல்லும் வகையில் மிகமுக்கியமான புரிந்துணர்வு ஒப்பந்தங்கள் கையெழுத்தாகின. வ.உ.சிதம்பரனார் துறைமுக ஆணையத்தின் தலைவர் சுசாந்த குமார் புரோஹித் அவர்களின் நேரடி முன்னிலையில் நடைபெற்ற இந்த நிகழ்வில், துறைமுக ஆணையத்தின் சார்பில் நிர்வாகப் பொறியாளர் எ. செந்தில் கணேஷ் மற்றும் ஓரியானா பவர் லிமிடெட் (Oriana Power Limited) நிறுவனத்தின் சார்பில் வர்த்தகத் தலைவர் ஓம்கார் நாத் மற்றும் இணை நிறுவனரும் நிர்வாக வர்த்தக அதிகாரியுமான அனிருத் சரஸ்வத் ஆகியோர் அதிகாரப்பூர்வமாக ஒப்பந்தங்களில் கையெழுத்திட்டனர்.
இந்த வரலாற்றுச் சிறப்புமிக்க முன்னெடுப்பின் ஒரு பகுதியாக, உத்தரப் பிரதேச மாநிலத்தைச் சேர்ந்த பிரபல ஓரியானா பவர் லிமிடெட் நிறுவனத்துடன் துறைமுக ஆணையம் கைகோர்த்துள்ளது. இதன்படி, தூத்துக்குடி துறைமுக வளாகத்தில் நவீன கார்பன் பிடிப்பு மற்றும் சேமிப்புக்கான (Carbon Capture and Storage) முன்னோடித் திட்டம் அமைக்கப்பட உள்ளது. மேலும், புவி வெப்பமடைதலைக் குறைக்கும் நோக்கில் பச்சை மெத்தனால் (Green Methanol) உற்பத்தி நிலையம் மற்றும் அதற்கான பிரத்யேக உட்கட்டமைப்புகளை உருவாக்கி, கார்பன் நடுநிலைமை இலக்குகளை எட்டவும், எதிர்கால எரிசக்தியான பச்சை ஹைட்ரஜன் (Green Hydrogen) ஏற்றுமதிக்கான தயாரிப்புப் பணிகளைத் தீவிரப்படுத்தவும் திட்டமிடப்பட்டுள்ளது. சுற்றுப்புறச் சூழல் மேலாண்மையின் மற்றொரு மைல்கல்லாக, தூத்துக்குடி மாநகராட்சி மற்றும் யுனிவர்சல் கிளீன்டெக் சொல்யூஷன்ஸ் நிறுவனத்துடன் ஒரு முத்தரப்பு ஒப்பந்தம் கையெழுத்தானது. இதன் மூலம் துறைமுகப் பகுதியில் நகராட்சி திடக் கழிவுச் செயலாக்க நிலையம் அமைக்கப்பட்டு, நகரக் கழிவுகளிலிருந்து பச்சை மெத்தனால் உற்பத்தி செய்யும் விந்தையான திட்டம் நடைமுறைக்கு வரவுள்ளது. இது கழிவு மேலாண்மை மற்றும் தூய எரிசக்தி உற்பத்தி ஆகிய இரண்டையும் இணைக்கும் ஒரு புரட்சிகரமான முயற்சியாகும்.
இந்த நிகழ்வின் விவாத அமர்வில் உரையாற்றிய துறைமுக ஆணையத் தலைவர் சுசாந்த குமார் புரோஹித், சர்வதேசக் கடல் வர்த்தகப் பாதைக்கு மிக அருகில் தூத்துக்குடி துறைமுகம் அமைந்துள்ள புவியியல் சாதகமான சூழலை உலக நாடுகளுக்கு விளக்கினார். சர்வதேசக் கப்பல் சேவை நிறுவனங்களுக்குத் தேவையான பசுமை மெத்தனால் வசதிகளை வழங்கத் தூத்துக்குடி துறைமுகம் தற்போது முழுமையாகத் தயாராக இருப்பதாகவும் அவர் பெருமிதத்துடன் குறிப்பிட்டார். மிகக் குறுகிய காலத்திலேயே ‘மெத்தனால் பங்கரிங்’ எனப்படும் கப்பல்களுக்கு எரிபொருள் நிரப்பும் பணிகளைத் தொடங்கி, பின்னர் அதனை வணிக ரீதியாக விரிவுபடுத்தி உலகளாவிய பசுமை வழித்தடங்களை உருவாக்க இலக்கு நிர்ணயிக்கப்பட்டுள்ளது. இந்த அதிநவீன முன்னெடுப்புகள் அனைத்தும் பாரதப் பிரதமரின் ‘விக்சித் பாரத்’ (Viksit Bharat) கனவுடன் ஒன்றிணைந்து, இந்தியாவின் எரிசக்தி மற்றும் தளவாட மதிப்புச் சங்கிலியை சர்வதேச அளவில் மேலும் வலுப்படுத்தும் என்பதில் ஐயமில்லை.
