சேலம் மாவட்டத்தில் நடந்த பரபரப்பான சம்பவம் ஒன்று தற்போது சமூக வலைதளங்களை கலக்கி வருகிறது. அதிமுக முன்னாள் எம்எல்ஏ மற்றும் திமுக முன்னாள் எம்பியான அர்ஜூனன், பொதுமக்களுடன் ஏற்பட்ட தகராறின் போது ஒரு பெண்ணை கன்னத்தில் அறைந்த வீடியோ வேகமாக பரவி வருகிறது.
சேலம் மாவட்டத்தை சேர்ந்த அர்ஜூனன், 1980-ஆம் ஆண்டு திமுக சார்பில் தர்மபுரி தொகுதியில் எம்பியாக தேர்ந்தெடுக்கப்பட்டவர். பின்னர் திமுகவிலிருந்து விலகி அதிமுகவில் இணைந்த அவர், ஜெயலலிதா தலைமையிலான அணியின் வேட்பாளராக 1989-ல் தாரமங்கலம், 1991-ல் வீரபாண்டி சட்டசபை தொகுதியில் எம்எல்ஏவாக தேர்ந்தெடுக்கப்பட்டார்.
அர்ஜூனன் அடிக்கடி பல சர்ச்சைகளில் சிக்கியவர் என்பதும் குறிப்பிடத்தக்கது. முன்பு டோல்கேட் பகுதியில் போலீசாருடன் ஏற்பட்ட தகராறை தொடர்ந்து அவர் அதிமுகவிலிருந்து நீக்கப்பட்டிருந்தார்.
சாலை விரிவாக்கத்தைக் காரணமாகச் சிக்கல்
சேலம் ஓமலூர் அருகே காமனேரி – சின்னதிருப்பதி இடையே சாலை விரிவாக்க பணிகள் நடைபெற்று வருகின்றன. இந்த பகுதியில் அர்ஜூனனின் நிலமும் இருப்பதாக கூறப்படுகிறது. இங்கு சாலை விரிவாக்கத்திற்கு அவர் எதிர்ப்பு தெரிவித்ததாக தகவல்கள் தெரிவிக்கின்றன. அதேசமயம், உள்ளூர் மக்கள் தங்களது நிலத்தைத் தவிர்த்து, சாலை வேறு வழியாக விரிவாக்கப்பட வேண்டும் என கோரியுள்ளனர். இதனால் இருபுறமும் கடும் வாக்குவாதம் ஏற்பட்டது.
ஆத்திரத்தில் பெண்ணை அறைந்த முன்னாள் எம்எல்ஏ
வாக்குவாதம் தீவிரமடைந்த நிலையில், திடீரென ஆத்திரமடைந்த அர்ஜூனன் தனது வேஷ்டியை மடித்து கட்டிக்கொண்டு, அங்கிருந்த ஒரு பெண்ணிடம் சென்று கன்னத்தில் அறைந்தார். மேலும் அவர் மிரட்டல் தொனியில் பேசும் காட்சியும் வீடியோவில் பதிவாகியுள்ளது. தொடர்ந்து அங்கிருந்த பொதுமக்கள், “பெண்ணை எப்படி அடிக்கலாம்?” என்று கேள்வி எழுப்பி அவரை முற்றுகையிட்டனர்.
இந்த காட்சி இணையதளங்களில் வெளிவந்ததும் பெரும் எதிர்ப்பை ஏற்படுத்தியுள்ளது. முன்னாள் எம்பி–எம்எல்ஏ என்ற நிலையில் இவ்வாறு நடந்து கொண்டதற்கு நெட்டிசன்கள் கடுமையாக கண்டனம் தெரிவித்து வருகின்றனர்.