மதுரை மாவட்டம் செமினிப்பட்டி ஊராட்சியில் அமைக்கப்பட்டுள்ள குடிநீர் சுத்திகரிப்பு இயந்திரம் கடந்த ஆறு மாதங்களாகப் பழுதாகிக் கிடப்பதால், இப்பகுதி மக்கள் குடிநீருக்காகத் தனியார் லாரிகளை நம்பி இருக்க வேண்டிய அவல நிலைக்குத் தள்ளப்பட்டுள்ளனர். போதிய பராமரிப்பின்றி மக்கள் வரிப்பணம் வீணடிக்கப்படுவதாகக் குற்றம் சாட்டியுள்ள கிராம மக்கள், மாவட்ட நிர்வாகம் உடனடியாகத் தலையிட வேண்டும் என கோரிக்கை விடுத்துள்ளனர்.
செமினிப்பட்டி ஊராட்சியில் முத்துச்சாமி பட்டி, நெய்க்காரக்குடிபட்டி, சுமதிபுரம் உள்ளிட்ட 6 குக்கிராமங்கள் உள்ளன. இங்கு 5 ஆயிரத்திற்கும் மேற்பட்ட மக்கள் வசித்து வருகின்றனர். இப்பகுதியில் உள்ள நிலத்தடி நீர் மற்றும் போர்வெல் தண்ணீர் அதிகப்படியான உப்புத் தன்மையுடன் காணப்படுவதால், அதனைத் தாகத்திற்குப் பயன்படுத்த முடியாது என்ற நிலை உள்ளது. பொதுமக்களின் இந்த இன்னலைத் தீர்க்கும் வகையில், கடந்த 2019-ஆம் ஆண்டு முத்துச்சாமி பட்டியில் சுமார் ரூ.10 லட்சம் மதிப்பீட்டில் நவீன குடிநீர் சுத்திகரிப்பு இயந்திரம் (RO Plant) நிறுவப்பட்டது.
துவக்கத்தில் இந்த இயந்திரம் மூலம் ஒரு குடம் குடிநீர் ரூ.5-க்கு வழங்கப்பட்டு வந்தது. ஆனால், முறையான தொழில்நுட்பப் பராமரிப்பு இல்லாததால் இந்த இயந்திரம் அடிக்கடி பழுதடைவதை வழக்கமாகக் கொண்டுள்ளது. தற்போது கடந்த 6 மாதங்களாக இந்த இயந்திரம் முழுமையாகச் செயலிழந்து கிடப்பதால், பொதுமக்கள் குடிநீருக்காகத் தனியார் தண்ணீர் லாரிகளில் ஒரு குடம் ரூ.15 முதல் ரூ.20 வரை விலை கொடுத்து வாங்கும் நிலைக்குத் தள்ளப்பட்டுள்ளனர். “உப்பு தண்ணீரைக் குடித்தால் சிறுநீரகப் பாதிப்பு (Kidney stones) ஏற்படும் என மருத்துவர்கள் எச்சரிக்கிறார்கள். வேறு வழியின்றி எங்கள் தினசரி வருமானத்தில் பெரும் பகுதியைத் தண்ணீருக்காகவே செலவிடுகிறோம்” என அப்பகுதி மக்கள் வேதனையுடன் தெரிவிக்கின்றனர்.
இது குறித்து ஊராட்சி செயலாளர் சுரேஷ் கூறுகையில், “ஏற்கனவே மோட்டார் பழுதானபோது சரி செய்தோம். தற்போது இயந்திரத்தில் உள்ள சென்சார் போர்டு (Sensor Board) பழுதாகியுள்ளது. இதனைச் சரி செய்ய சுமார் ரூ.80 ஆயிரம் நிதி தேவைப்படுகிறது. ஊராட்சியில் வரி வசூல் செய்த பிறகு இன்னும் 2 மாத காலத்திற்குள் இயந்திரம் சரி செய்யப்படும்” எனத் தெரிவித்துள்ளார். ஊராட்சி நிர்வாகத்தின் இந்தத் தாமதமான பதிலால் மக்கள் மேலும் ஆத்திரமடைந்துள்ளனர். அத்தியாவசியத் தேவையான குடிநீருக்காக இரண்டு மாதங்கள் காத்திருக்கச் சொல்வது நியாயமற்றது என்றும், மாவட்ட ஆட்சியர் சிறப்பு நிதி ஒதுக்கி இந்தப் பிரச்சினையைத் தீர்க்க வேண்டும் என்றும் சமூக ஆர்வலர்கள் வலியுறுத்தி வருகின்றனர்.