நீலகிரி மாவட்டம் கூடலூர் வட்டம், ஸ்ரீமதுரை ஊராட்சிக்கு உட்பட்ட தேன்கொல்லி கிராமத்தில், பழங்குடியின மக்களின் வாழ்வாதாரத்தை மேம்படுத்தும் நோக்கில் டிவிஎஸ் சீனிவாசன் சேவைகள் அறக்கட்டளை (TVS SST) சார்பில் புனரமைக்கப்பட்ட 10 புதிய வீடுகளை மாவட்ட ஆட்சியர் லட்சுமி பவ்யா தண்ணீரு இன்று அதிகாரப்பூர்வமாகத் திறந்து வைத்தார். கார்ப்பரேட் சமூகப் பொறுப்புணர்வு (CSR) திட்டத்தின் கீழ், ஒரு வீட்டிற்குத் தலா ரூ.8.20 லட்சம் வீதம் மொத்தம் ரூ.82 லட்சம் மதிப்பீட்டில் இந்தப் புனரமைப்பு மற்றும் பழுதுபார்க்கும் பணிகள் மிக நேர்த்தியாகச் செய்து முடிக்கப்பட்டுள்ளன.
புதிய வீடுகளைப் பார்வையிட்ட பின்னர் செய்தியாளர்களிடம் பேசிய மாவட்ட ஆட்சியர் லட்சுமி பவ்யா தண்ணீரு, “நீலகிரி மாவட்டத்தின் கடைக்கோடி கிராமங்களில் வசிக்கும் பழங்குடியின மக்களின் முன்னேற்றத்திற்காக டிவிஎஸ் சீனிவாசன் சேவைகள் அறக்கட்டளை தொடர்ந்து பல்வேறு ஆக்கப்பூர்வமான பணிகளைச் செய்து வருகிறது. இன்று திறக்கப்பட்டுள்ள 10 வீடுகளைப் பொதுமக்கள் சுகாதாரமான முறையில் பராமரிக்க வேண்டும். இதே பகுதியில் மேலும் 18 வீடுகளுக்கான புனரமைப்புப் பணிகள் விறுவிறுப்பாக நடைபெற்று வருகின்றன,” என்று தெரிவித்தார். மேலும், வரவிருக்கும் சட்டமன்றத் தேர்தலை முன்னிட்டு, “ஜனநாயகக் கடமையை நிறைவேற்ற வாக்காளர்கள் அனைவரும் தவறாமல் வாக்களிக்க வேண்டும்” என வலியுறுத்தி, பழங்குடியின மக்களிடையே தேர்தல் விழிப்புணர்வு துண்டுப் பிரசுரங்களையும் ஆட்சியர் நேரில் வழங்கினார்.
இந்நிகழ்வில் கூடலூர் வருவாய் கோட்டாட்சியரின் நேர்முக உதவியாளர் சரவணன், கூடலூர் வட்டார வளர்ச்சி அலுவலர் சலீம் ஆகியோர் முன்னிலை வகித்தனர். டிவிஎஸ் சீனிவாசன் சேவைகள் அறக்கட்டளை சார்பில் கள இயக்குநர் சவுரிராஜன், சமூக மேம்பாட்டு அலுவலர் திலகராணி, கிராம மேம்பாட்டு அலுவலர் ஜான்சிராணி மற்றும் ஓய்வுபெற்ற கள இயக்குநர் சுந்தரராஜன் உள்ளிட்ட முக்கியப் பொறுப்பாளர்கள் கலந்து கொண்டனர். மாவட்ட நிர்வாகமும் தனியார் அறக்கட்டளையும் இணைந்து மேற்கொண்டுள்ள இந்த முன்னெடுப்பு, அடர் வனப்பகுதிகளில் வசிக்கும் பழங்குடியின மக்களின் பாதுகாப்பான வசிப்பிடக் கனவை நனவாக்கியுள்ளது.