தமிழக வெற்றிக் கழகத்தின் தலைவரும், பிரபல நடிகருமான விஜய் மற்றும் அவரது மனைவி சங்கீதா இடையிலான விவாகரத்து விவகாரம், தற்போது சட்ட ரீதியாக அடுத்த கட்டத்தை எட்டியுள்ளது. லண்டன் பிரஜையான சங்கீதா (48), ஏற்கனவே செங்கல்பட்டு நீதிமன்றத்தில் விவாகரத்து கோரி மனு தாக்கல் செய்திருந்த நிலையில், தற்போது விவாகரத்து வழக்கு முடியும் வரை நீலாங்கரையில் உள்ள விஜய்யின் இல்லத்திலேயே தான் தங்கியிருக்க அனுமதிக்க வேண்டும் அல்லது அதற்கு இணையான மாற்று வசிப்பிடத்தை அவர் ஏற்பாடு செய்து தர வேண்டும் எனக்கோரி கூடுதல் மனு ஒன்றைத் தாக்கல் செய்துள்ளார். சுமார் 26 ஆண்டுகால மணவாழ்க்கைக்குப் பிறகு, ஒரு நடிகையின் குறுக்கீடு காரணமாகத் தங்களது குடும்ப உறவில் விரிசல் ஏற்பட்டதாகச் சங்கீதா தனது மனுவில் குறிப்பிட்டிருப்பது சமூக வலைதளங்களில் பெரும் விவாதத்தை ஏற்படுத்தியுள்ளது.
சங்கீதா தனது மனுவில், திருமணத்திற்குப் பிறகு சாலிகிராமம், அடையாறு கஸ்தூரிபா நகர் மற்றும் நீலாங்கரை கபாலீஸ்வரர் நகர் ஆகிய இடங்களில் விஜய்யுடன் இணைந்து வாழ்ந்த நினைவுகளைப் பகிர்ந்துள்ளார். 2021-ஆம் ஆண்டு வரை ஒருவருக்கொருவர் எவ்விதக் குறையுமின்றி வாழ்ந்து வந்ததாகவும், அதன் பிறகு விஜய்யின் போக்கில் மாற்றம் ஏற்பட்டதாகவும் அவர் தெரிவித்துள்ளார். பரஸ்பரம் பிரிந்து செல்ல எடுத்த முயற்சிகள் தோல்வியடைந்த நிலையில், தற்போது விவாகரத்து வழக்கு தொடர்ந்துள்ளதால், தன்னை வீட்டிற்குள் அனுமதிக்க விஜய் தரப்பு மறுக்கக்கூடும் என்ற அச்சத்தையும் அவர் வெளிப்படுத்தியுள்ளார். லண்டன் குடியுரிமை கொண்ட தமக்குச் சென்னையில் வேறு தங்குமிடம் இல்லாத சூழலில், சட்டப்படி கணவரின் வீட்டில் வசிக்கும் உரிமை தமக்கு உள்ளதாக அவர் வாதிட்டுள்ளார்.
இதற்கிடையே, சென்னையில் சமீபத்தில் நடைபெற்ற ஒரு திருமண நிகழ்வில் சம்பந்தப்பட்ட நடிகையுடன் விஜய் ஜோடியாகப் பங்கேற்ற புகைப்படங்கள் மற்றும் வீடியோக்கள் இணையத்தில் வைரலாகி வரும் நிலையில், சங்கீதாவின் இந்த புதிய மனு வழக்கின் முக்கியத்துவத்தை அதிகரித்துள்ளது. இந்த விவகாரம் அரசியல் வட்டாரத்திலும் பெரும் பேசுபொருளாக மாறியுள்ள சூழலில், சங்கீதா தாக்கல் செய்துள்ள கூடுதல் மனுவை முதன்மை மனுவுடன் சேர்த்து விசாரிக்க நீதிமன்றம் திட்டமிட்டுள்ளது. வரும் ஏப்ரல் 20-ஆம் தேதி இந்த வழக்கின் அடுத்தகட்ட விசாரணை நடைபெறவுள்ள நிலையில், நீதிமன்றம் விஜய்க்கு என்ன உத்தரவு பிறப்பிக்கும் என்பதைத் தமிழகமே உற்று நோக்கி வருகிறது.