ஹிமாச்சலப் பிரதேச மாநிலத்தில் பருவமழை காரணமாக ஏற்பட்ட நிலச்சரிவில், நாயின் எச்சரிக்கை குரலால் 67 பேர் உயிர் பிழைத்த நெகிழ்ச்சிகரமான சம்பவம் இடம்பெற்றுள்ளது.
மண்டி மாவட்டத்தில் உள்ள சியாத்தி கிராமத்தில், கடந்த சில நாட்களாக தொடர்ந்து கனமழை பெய்து வருகின்றது. இதன் விளைவாக அந்த பகுதியில் சாலைகள் துண்டிக்கப்பட்டுள்ளன; குடியிருப்புகள் வெள்ளத்தில் மூழ்கியுள்ளன ; பாலங்கள் அடித்து செல்லப்பட்டுள்ளன. மாநிலம் முழுவதும் மழை மற்றும் நிலச்சரிவினால் இதுவரை 78 பேர் உயிரிழந்துள்ளனர்.
இந்நிலையில், நள்ளிரவில் தூங்கிக் கொண்டிருந்த ஒரு நாய் திடீரென சத்தமாக குரைத்துள்ளது. அதனை தொடர்ந்து அதன் உரிமையாளர் நரேந்திரா விழித்து, வீட்டின் சுவரில் பெரிய விரிசல் ஏற்பட்டதை கவனித்துள்ளார். அதேவேளை தண்ணீரும் உள்ளே புகுந்ததைக் கண்டு உடனே கிராம மக்களை எழுப்பி, அனைவரும் அருகிலுள்ள தேவி கோவிலுக்கு தஞ்சம் புகும்படி எச்சரித்துள்ளார்.
இதைத் தொடர்ந்து, வெறும் சில நிமிடங்களில் ஏற்பட்ட நிலச்சரிவால் பல வீடுகள் இடிந்து விழுந்தன. ஆனால், நாயின் சத்தத்தால் எழுந்து விழிப்புணர்வுடன் செயல்பட்டதால் 67 பேர் உயிர் பிழைத்தனர்.
நாயின் செயலால் கிராம மக்கள் நெகிழ்ச்சியில் உள்ளனர். “அது குரைக்கவில்லை என்றால் இன்று நாங்கள் வாழ்ந்திருக்க மாட்டோம்” என்று உரிமையாளர் நரேந்திரா கூறினார்.
தற்போது, அந்த கிராமத்தில் ஐந்து வீடுகளைத் தவிர மற்ற அனைத்தும் நிலச்சரிவில் இடிந்து போயுள்ளது. உயிர் பிழைத்தவர்கள் அனைவரும் கோவிலில் தற்காலிகமாக தங்க வைக்கப்பட்டுள்ளனர்.
