கூட்டணியின் பெயரை முன்வைத்து அவமரியாதை செய்வதை ஒருபோதும் ஏற்றுக்கொள்ள முடியாது என்று காங்கிரஸ் எம்.பி. ஜோதிமணி தெரிவித்துள்ளார்.
கரூர் நகர காங்கிரஸ் நிர்வாகி ஒருவர் திமுகவில் இணைந்த புகைப்படங்களை முன்னாள் அமைச்சர் மற்றும் திமுக மாவட்ட செயலாளர் செந்தில் பாலாஜி தனது சமூக வலைதளத்தில் பகிர்ந்திருந்தார். இதற்கு கடுமையான எதிர்வினையுடன் ஜோதிமணி பதிவிட்டுள்ளார்.
அதில், கூட்டணி தர்மம் என்பது இருபுறமும் இருக்க வேண்டியது அவசியம். ஒரு முன்னாள் அமைச்சர், மாவட்ட செயலாளர் என்பவரால் காங்கிரஸ் கட்சி பொதுவெளியில் அவமதிக்கப்படுவது ஏற்றுக்கொள்ள முடியாது. இத்தகைய சம்பவங்கள் இது முதல் முறையல்ல. கூட்டணி என்பது பரஸ்பர புரிதல், நம்பிக்கை, மரியாதை அடிப்படையில் இயங்க வேண்டும். என்று அவர் குறிப்பிட்டுள்ளார். மேலும், “கரூர் நாடாளுமன்றத் தொகுதியின் எம்.பி. என்ற நிலையில், காங்கிரஸ் கட்சியின் சுயமரியாதையை காப்பாற்றும் பொறுப்பு எனக்கு உண்டு. இதுபோன்ற அவமரியாதையை எளிதில் புறக்கணிக்க முடியாது” என்றும் வலியுறுத்தினார்.
இதேபோல், “இந்த சம்பவம் குறித்து தமிழ்நாடு காங்கிரஸ் தலைவர் செல்வப் பெருந்தகை, முதலமைச்சர் மற்றும் திமுக தலைவர் மு.க.ஸ்டாலின் அவர்களது கவனத்திற்குக் கொண்டு செல்வார் என நம்புகிறேன்” எனவும் தெரிவித்துள்ளார்.
அத்துடன், “பாசிச சக்திகளுக்கு எதிராக தமிழ்நாட்டின் எதிர்கால நலனை முன்னிறுத்திச் செயல்பட வேண்டும் என்பது அனைவருக்கும் கடமை” என்றும் அவர் வலியுறுத்தியுள்ளார்.
பின்குறிப்பாக, தமிழ்நாடு மகளிர் காங்கிரஸ் கடும் எதிர்வினை தெரிவித்ததைத் தொடர்ந்து, செந்தில் பாலாஜி தனது பதிவை நீக்கியுள்ளதாகவும் ஜோதிமணி தெரிவித்துள்ளார்.
