செல்வப்பெருந்தகையின் நடவடிக்கையால் குழப்பம்: வி.சி.க.–காங்கிரஸ் இடையே கருத்து வேறுபாடு!

சென்னை : பா.ம.க.வை ‘இண்டி’ கூட்டணியில் இணைக்கும் முயற்சியை தமிழக காங்கிரஸ் மேற்கொள்வது கவலையை ஏற்படுத்துவதாக வி.சி.க. மதுரை எம்.பி. ரவிக்குமார் தெரிவித்துள்ளார். இந்த முயற்சி, இண்டி கூட்டணிக்குள் சலசலப்பையும், கருத்து வேறுபாடுகளையும் உருவாக்கியுள்ளதாக அவர் கூறினார்.

இதேவேளை, பா.ம.க.வில் ராமதாஸ் மற்றும் அன்புமணி இடையே கடந்த சில வாரங்களாகவே வாக்குவாதம் மற்றும் அதிகாரப் பிரச்சனைகள் நிலவுகின்றன. நிர்வாகிகளின் பதவிகள் மாற்றப்பட்டு, கட்சி உள்ளே குழப்ப நிலை உருவாகியுள்ளது. குறிப்பாக கடந்த பார்லிமென்ட் தேர்தலில் அ.தி.மு.க. கூட்டணியில் செல்லவேண்டும் என ராமதாஸ் விரும்பியதாகவும், அன்புமணியின் அழுத்தத்தால் பா.ஜ. கூட்டணியில் சேர்ந்தோம் என்பதையே தோல்விக்கான காரணமாக அவர் தெரிவித்து இருந்தது பெரும் அரசியல் பரபரப்பை ஏற்படுத்தியது.

இந்த நிலையில், பா.ம.க.வில் ஏற்பட்டுள்ள குழப்பத்தை பயன்படுத்தி, பல அரசியல் கட்சிகள் அக்கட்சியை தங்களது கூட்டணியில் இணைக்க விரைந்து செயல்படுகின்றன. இந்நிலையில், தமிழக காங்கிரஸ் தலைவர் செல்வப்பெருந்தகை, பா.ம.க. நிறுவனர் டாக்டர் ராமதாஸை நேரில் சந்தித்ததாகவும், கூட்டணி பற்றி விவாதிக்கப்பட்டதாகவும் தகவல்கள் வெளியானது.

இந்த நடவடிக்கைக்கு காங்கிரஸ் கட்சிக்குள்ளேயே எதிர்ப்பு எழுந்துள்ளது. விருதுநகர் எம்.பி. மாணிக்கம் தாகூர் வெளியிட்டுள்ள சமூக வலைதள பதிவில்,

2014 முதல் மோடியுடன் இணைந்து, தற்போது வரை பா.ம.க. அந்தக் கொள்கைகளைப் பின்பற்றிவரும் நிலையில், அந்தக் கட்சியைக் கூட்டணியில் ஏற்க முடியுமா? கட்சி மீது நம்பிக்கை வைத்திருந்து, அனைத்து போராட்டங்களிலும் ராகுல் காந்திக்கு துணையாக இருந்தவர்களை ஏன் புறக்கணிக்க வேண்டும்? இது கட்சியின் கருத்தாகாது; உங்கள் தனிப்பட்ட எண்ணமே,”
என்று விமர்சித்துள்ளார்.

இது தொடர்பாக, காங்கிரசின் தேசிய பொதுச்செயலாளர் கே.சி. வேணுகோபாலிடம் வி.சி.க. எம்.பி. மற்றும் பொதுச்செயலாளர் ரவிக்குமார் கேள்வி எழுப்பியுள்ளார்.

வி.சி.க. எப்போதும் மாநில மற்றும் தேசிய அளவில் ‘இண்டி’ கூட்டணிக்கு உறுதியுடன் இருக்கிறது. மதச்சார்பின்மையும், அரசியலமைப்பையும் பாதுகாப்பதற்காக சமீபத்தில் திருச்சியில் பெரிய அளவில் நாம் ஊர்வலம் நடத்தியோம். அனைத்து நேரங்களிலும் ராகுல் காந்தியின் நெறிகளில் நாங்கள் உறுதியாக நிற்கிறோம்” என்று அவர் தெரிவித்துள்ளார்.

இந்த நிலையில், தமிழக காங்கிரஸ் கட்சி, என்.டி.ஏ., கூட்டணியில் அங்கம் வகிக்கும் ஒரு கட்சியை (பா.ம.க.,) இண்டி கூட்டணிக்கு இழுக்கும் முயற்சி கவலையை ஏற்படுத்துகிறது. குறிப்பாக, இந்த முயற்சி, தி.மு.க., தலைமையிலான கூட்டணி, பா.ஜ., கூட்டணியை எதிர்க்க போதுமான வலிமையுடன் இல்லை என்பதைப் போல உள்ளது. இதற்கு உங்களின் ஒப்புதல் பெறப்பட்டதா?’ என்று கேள்வி எழுப்பினார்.