கிறிஸ்துமஸ் மற்றும் புத்தாண்டு பண்டிகைகள் நெருங்கி வரும் நிலையில், திண்டுக்கல் மாவட்டம் கொடைக்கானலில் உள்ள ஒரு தனியார் கேக் ஹவுஸ், பாரம்பரிய முறைப்படி 150 கிலோ பிளம் கேக் தயாரிக்கும் பணியைத் தொடங்கியுள்ளது. இந்தக் கலவையில் ஆல்கஹால் இல்லாத ஒயின் பயன்படுத்தப்படுவது இதன் தனிச்சிறப்பாகும். கிறிஸ்துமஸ் பண்டிகை உலகம் முழுவதும் வருகின்ற டிசம்பர் 25ஆம் தேதி கொண்டாடப்பட உள்ளது.
குறிப்பாக ஐரோப்பிய நாடுகளில், பண்டிகைக்கு 45 நாட்களுக்கு முன்னதாகவே உலர் பழங்கள் மற்றும் மது வகைகளைப் பயன்படுத்தி கேக் கலவையைத் தயாரித்து பதப்படுத்துவது வழக்கம். இதே பாரம்பரிய முறையைப் பின்பற்றி, கொடைக்கானல் ஏரிச்சாலை அருகே அமைந்துள்ள தனியார் கேக் ஹவுஸ், இந்த ஆண்டுக்கான பிளம் கேக் தயாரிப்புப் பணியைத் தொடங்கியுள்ளது. பொருட்கள்: இந்தக் கலவையில் பாதாம், பிஸ்தா, முந்திரி வகைகள், உலர் திராட்சை, கிறிஸ்துமஸ் பழம், அத்திப்பழம் உள்ளிட்ட சுமார் 15 வகை உலர் பழங்கள் பயன்படுத்தப்பட்டுள்ளன.
சிறப்பம்சம்: மேலும், இந்த கேக்கின் சுவை மற்றும் தரத்தை மேம்படுத்த சுமார் 5 லிட்டர் ஆல்கஹால் இல்லாத ஒயின் (Non-Alcoholic Wine) பயன்படுத்தப்பட்டுள்ளது. தயாரிப்பு முறை: கேக் ஹவுஸ் உரிமையாளர் மற்றும் சமையல் கலைஞர் வினோத் அவர்கள், இந்த பிரம்மாண்டக் கலவையைத் தயார் செய்து, அதனை முப்பது நாட்கள் பதப்படுத்தி வைக்க உள்ளதாகத் தெரிவித்தார் பதப்படுத்தப்பட்ட இந்த கலவையுடன், கிறிஸ்துமஸிற்கு இரண்டு தினங்களுக்கு முன்பாக மாவு சேர்த்து, மொத்தமாக 150 கிலோ எடை கொண்ட பிளம் கேக் தயாரிக்கப்பட உள்ளதாக அவர் கூறியுள்ளார். குழந்தைகள் தினம் கொண்டாடப் படுவதை முன்னிட்டு, கேக் ஹவுஸ் உரிமையாளர் வினோத் அவர்கள் ஒரு சிறப்பான ஏற்பாட்டைச் செய்திருந்தார்.
கலவை பங்கேற்பு: குழந்தைகளுக்கு உற்சாகம் அளிக்கும் வகையில், அவர்களை இந்த கேக் கலவை தயாரிப்புப் பணியில் ஈடுபடுத்தி மகிழ்ச்சி அடைந்ததாகவும் அவர் தெரிவித்துள்ளார். கிறிஸ்துமஸ் பண்டிகைக்கு இரண்டு நாட்களுக்கு முன்பு தயாராகும் இந்த பிளம் கேக்குகளை, கொடைக்கானலுக்கு வரும் சுற்றுலாப் பயணிகளுக்கும், பொதுமக்களுக்கும் விற்பனை செய்யத் திட்டமிடப்பட்டுள்ளது. இந்த கேக் ஹவுஸின் தனிச்சிறப்பு என்னவென்றால், இவர்கள் எவ்வித ரசாயனக் கலவைகளும் இல்லாமல் (Chemical-free) மற்றும் சுகாதாரமான முறையில் பிளம் கேக்குகளைத் தயாரித்து வழங்குவதே ஆகும் என்று சமையல் கலைஞர் வினோத் அவர்கள் குறிப்பிட்டார்.
