தமிழக பாஜக தொடர்பான முக்கிய ஆலோசனை கூட்டம் டெல்லியில் உள்துறை அமைச்சர் அமித்ஷா இல்லத்தில் நடைபெற்றது. ஆனால், முன்னாள் மாநிலத் தலைவர் அண்ணாமலை இதில் பங்கேற்காதது அரசியல் வட்டாரங்களில் பல்வேறு சந்தேகங்களை கிளப்பியுள்ளது.
அண்மையில் தமிழகம் வந்திருந்த மத்திய நிதியமைச்சர் நிர்மலா சீதாராமன், பாஜக நிர்வாகிகளுடன் ஆலோசனை நடத்தியபோது, கட்சிக்குள் ஒற்றுமை இல்லாமை, மத்திய அரசின் திட்டங்கள் மக்களிடம் சென்று சேராதது,
கூட்டணிக்குப் பின்னும் கட்சியின் களப்பணிகள் பலவீனமடைதல் போன்ற குறைகளை சுட்டிக்காட்டியிருந்தார். இதனால் அதிருப்தியடைந்த அவர் கடும் மனவருத்தத்துடன் திரும்பிச் சென்றதாக தகவல்கள் வெளியாகின.
இந்த சூழலில், வரவிருக்கும் தமிழக சட்டமன்றத் தேர்தல் தயாரிப்பு, அதிமுக கூட்டணியுடனான ஒருங்கிணைப்பு, தொகுதி பொறுப்பாளர்கள் நியமனம் மற்றும் பாஜக மாநாடு குறித்த விவாதங்களுக்காக டெல்லியில் ஆலோசனை கூட்டம் நடைபெற்றது. இதில், மாநிலத் தலைவர் நயினார் நாகேந்திரன், தமிழிசை சௌந்தரராஜன், பொன் ராதாகிருஷ்ணன், வானதி சீனிவாசன், எல். முருகன் உள்ளிட்டோர் பங்கேற்றனர்.
ஆனால், இத்தகைய முக்கிய ஆலோசனையில் அண்ணாமலை வராதது கவனம் ஈர்த்துள்ளது. 2023இல் அதிமுகவுடனான கூட்டணி முறிவு, சமீபத்தில் எடப்பாடி பழனிசாமிக்கு ஆதரவாக அவர் எடுத்த நிலைப்பாடு, மேலும் கடந்த தேர்தலில் பாஜகவுக்கு சீட் கூட கிடைக்கவில்லை என நிர்மலா சீதாராமன் நேரடியாக சுட்டிக்காட்டிய குறிப்பு – இவை அனைத்தும் அவரைச் சுற்றியுள்ள அரசியல் கேள்விகளை அதிகரித்துள்ளன.
தான் திருமண நிகழ்வுகள் மற்றும் தனிப்பட்ட வேலைகள் காரணமாக டெல்லி கூட்டத்தில் பங்கேற்க முடியவில்லை என அண்ணாமலை விளக்கம் அளித்திருந்தாலும், கட்சி கூட்டங்களில் ஒருபோதும் தவறாமல் பங்கேற்ற அவரின் இன்றைய காணாமற்போனது பலரையும் ஆச்சரியத்தில் ஆழ்த்தியுள்ளது.
