புதுக்கோட்டை மாவட்டத்தில் நடைபெற்று வரும் வாக்காளர் பட்டியல் சிறப்பு தீவிர திருத்தப் பணிகள் மீது மாவட்ட தேர்தல் அலுவலர் மற்றும் கலெக்டர் மு.அருணா அறந்தாங்கி நகராட்சி அலுவலகத்தில் நேரடி ஆய்வு நடத்தினார். இந்த ஆய்வில், மனுக்கள் பெறுதல் முதல் ஆவண சரிபார்ப்பு, பதிவேடுகள் பராமரிப்பு, கணினி பதிவேற்றம் போன்ற அனைத்து கட்டங்களும் விதிமுறைகளுக்கு இணங்க செயலில் உள்ளதா என்பதை அவர் நெருக்கமாக பரிசோதித்தார். வேலை சீராக போகிறதா, எங்கு தாமதம் இருக்கிறது, எது சரியாகப் பதிவு செய்யப்படவில்லை போன்றவற்றைத் திருத்துமாறும் அவர் அலுவலர்களை நேரடியாக எச்சரித்தார்.
அறந்தாங்கி சட்டமன்றத் தொகுதிக்குட்பட்ட மூன்று வட்டங்கள் — அறந்தாங்கி, ஆவுடையார்கோவில், மணமேல்குடி — ஆகியவற்றில் மொத்தம் 285 வாக்குச்சாவடி நிலை அலுவலர்கள் பணியில் உள்ளனர். இதில் பணியை 100% நிறைவு செய்த 38 அதிகாரிகள் தனியாக பாராட்டப்பட்டனர். இது “நடவடிக்கை முடிந்தால் பாராட்டு; தாமதமானால் சகிப்பதில்லை” என்பதைக் கிளியர் செய்த செயல்.
மீதமுள்ள அதிகாரிகள் பணிகளை முடிக்க வேண்டும் என கலெக்டர் திடமான அறிவுறுத்தல் வழங்கினார். வாக்காளர் பட்டியல் என்பது தேர்தல் இயந்திரத்தின் முதல் படி என்பதால் இதில் அலட்சியம் சகிக்கப்படமாட்டாது என்பதை அவர் செயல்முறையிலேயே வெளிப்படுத்தினார்.
இந்த ஆய்வில் அறந்தாங்கி வருவாய் கோட்டாட்சியர் அபிநயா, வட்டாட்சியர்கள் க.கருப்பையா (அறந்தாங்கி), இரா.பாலகிருஷ்ணன் (ஆவுடையார்கோவில்), இரா.பன்னீர்செல்வம் (மணமேல்குடி) உள்ளிட்ட பல அரசு அலுவலர்கள் பங்கேற்றனர். திருச்சிராப்பள்ளி மாவட்டத்தில் வாக்காளர் பட்டியல் சிறப்பு தீவிர திருத்தப் பணிகள் வேகமெடுக்க வேண்டிய நிலையில், கலெக்டர் வே. சரவணன் நேரடி ஆய்வில் இறங்கியதால், பணியின் தீவிரம் மேலும் உயர்ந்துள்ளது. இந்திய தேர்தல் ஆணையத்தின் உத்தரவின்படி நடைபெறும் இந்த திருத்தப்பணியில், மாவட்டத்திற்குட்பட்ட 9 சட்டமன்ற தொகுதிகளில் 2,543 வாக்குச்சாவடி நிலை அலுவலர்கள் வீடு வீடாக சென்று பணியில் ஈடுபட்டு வருகின்றனர்.
மொத்தம் 23,68,967 வாக்காளர்களில், இதுவரை 22,74,733 பேருக்கு முன்நிரப்பப்பட்ட கணக்கெடுப்பு படிவங்கள் (Enumeration Forms) வழங்கப்பட்டுள்ளன. இதில் 15,38,829 படிவங்கள் வாக்காளர்களிடமிருந்து பூர்த்தி செய்யப்பட்ட நிலையில் மீளப் பெற்று, செயலியில் பதிவேற்றப்பட்டுள்ளன. இதுவே முன்னேற்றம் காணப்பட்டாலும், மீதமுள்ள படிவங்களைப் பெறும் போது சுணக்கம் தெளிவாக இருப்பதை அதிகாரிகள் ஒப்புக்கொள்கிறார்கள்.
பணியின் நெருக்கடியை கருத்தில் கொண்டு, கலெக்டர் வே.சரவணன் திருச்சி (கிழக்கு), இலால்குடி, மண்ணச்சநல்லூர் ஆகிய 3 சட்டமன்ற தொகுதிகளில் நேரடி ஆய்வு மேற்கொண்டு, பணியின் வேகம் மற்றும் தரத்தை உயர்த்தும் வகையில் அலுவலர்களுக்கு தெளிவான அறிவுறுத்தல்களை வழங்கினார்.
முன்னேற்றத்தை மேலும் உறுதிப்படுத்த ஒவ்வொரு சட்டமன்ற தொகுதியுக்கும் 5 மண்டல அலுவலர்கள் என மொத்தம் 45 மண்டல அலுவலர்கள், அதனுடன் 4 கூடுதல் கண்காணிப்பாளர்கள் நியமிக்கப்பட்டு தொடர்ச்சியாக கண்காணிப்பு நடைபெற்று வருகிறது. படிவ விநியோகம், மீளளிப்பு, செயலியில் பதிவேற்றம் ஆகிய மூன்று கட்டங்களிலும் சீராக கண்காணிப்பு நடைபெற வேண்டும் என்பதே நிர்வாகத்தின் திடமான நிலைப்பாடு.
இந்நிலையில், சில வாக்காளர்கள் 2002/2005 வாக்காளர் பட்டியல் விவரங்கள் தெரியவில்லை என்பதால் படிவத்தை சமர்ப்பிக்காமல் இருப்பது பெரிய தடையாக உள்ளது. இதை எதிர்கொண்டு, கலெக்டர் வே.சரவணன் வாக்காளர்களுக்கு நேரடியாக அறிவுரை வழங்கியுள்ளார்:
“பழைய வாக்காளர் பட்டியல் விவரங்கள் தெரியாவிட்டாலும் கவலைப்பட வேண்டாம். கணக்கெடுப்பு படிவத்தில் அடிப்படை விபரங்களை மட்டும் பூர்த்தி செய்து கையொப்பமிட்டு உடனடியாக வாக்குச்சாவடி நிலை அலுவலரிடம் ஒப்படையுங்கள்.” வாக்காளர் பட்டியல் முழுமை பெற வேண்டிய கடைசி கட்டத்தில் தாமதம் ஏற்படாதவாறு, வாக்காளர்கள் இறுதி நாளை காத்திருக்காமல் உடனடியாக படிவங்களை வழங்க வேண்டும் என கேட்டுக்கொண்டார்.