தமிழ் மாதங்களில் முக்கியமானதாகும் ஆடி மாதத்தின் வெள்ளிக்கிழமைகள், ஆன்மிகம் மற்றும் பக்தியில் தனிச்சிறப்பை பெறுகின்றன. இந்த ஆண்டு, ஆடி மாதம் தொடங்கியதிலிருந்து அடுத்த நாளே வரும் முதல் வெள்ளிக்கிழமை என்பதால், இது மேலும் பக்தர்களுக்கு சிறப்பாக அமைந்துள்ளது.
பொதுவாக ஆடி வெள்ளியில் அம்மனை வழிபட்டால் திருமண பாக்கியம், குழந்தை பாக்கியம், மற்றும் வாழ்க்கை வளம் கிடைக்கும் என்பது மக்கள் மத்தியில் நிலவும் நம்பிக்கையாகும். இதை முன்னிட்டு, தமிழகத்தின் பல்வேறு கோவில்களில் இன்று அதிகாலை முதல் பக்தர்கள் திரண்டுள்ளனர்.
புதுக்கோட்டை மாவட்டம் அறந்தாங்கியில் அமைந்துள்ள பழமையான வீரமாகாளி அம்மன் கோவிலில் ஆயிரக்கணக்கான பெண் பக்தர்கள் விளக்கேற்றி சிறப்பு வழிபாடுகளில் ஈடுபட்டனர். அவர்கள் அம்மனுக்கு நெய்விளக்கு ஏற்றி, விரதம் இருந்து நேர்த்திக்கடன்களை செலுத்தினர்.
இதேபோல், திருச்சியில் உள்ள சமயபுரம் மாரியம்மன் கோவிலிலும் ஆடி வெள்ளியை முன்னிட்டு சிறப்பு அபிஷேகங்கள் மற்றும் பூஜைகள் நடைபெற்றன. கோவிலின் மண்டபத்தில் நெய்விளக்கு, சூடம் ஏற்றி, பால்குடம் மற்றும் அக்னிசட்டி ஏந்தி, பக்தர்கள் தங்களது நேர்த்திக்கடன்களை செலுத்தினர்.
இவ்வாறு ஆடி வெள்ளியின் ஆன்மிக சுழற்சி, மக்கள் மனங்களில் இடம்பிடித்து, கோவில்களில் பக்தி ஒளியுடன் வழிபாடுகள் நடைபெற்று வருகின்றன.
