ஈரோடு மாநகராட்சிக்கு உட்பட்ட எஸ்.கே.சி. சாலை நடுநிலைப் பள்ளியில் ஆறாம் வகுப்பு பயின்று வரும் மாணவன் கார்த்திகுமார், விளையாட்டு மற்றும் தற்காப்புக் கலைகளில் அடுத்தடுத்த சாதனைகளைப் படைத்து ஈரோடு மாவட்டத்திற்குப் பெருமை தேடித் தந்துள்ளார். சமீபத்தில் திருச்சி மாவட்டம் துறையூரில் நடைபெற்ற பிரம்மாண்ட கின்னஸ் உலக சாதனை சிலம்பம் நிகழ்ச்சியில் பங்கேற்ற கார்த்திகுமார், சுமார் 45 நிமிடங்கள் இடைவிடாது சிலம்பம் சுற்றி வியக்க வைத்தார். இவரது அசாத்தியத் திறமையைப் பாராட்டி கின்னஸ் உலக சாதனைக்கான விருதும், சான்றிதழும் வழங்கிக் கௌரவிக்கப்பட்டது.
மாணவன் கார்த்திகுமாரின் ஆர்வம் சிலம்பத்தோடு மட்டும் நின்றுவிடவில்லை. தற்காப்புக் கலையான கராத்தே, இலக்கைத் துல்லியமாகக் கணிக்கும் துப்பாக்கிச் சுடுதல் எனப் பல்வேறு துறைகளிலும் இவர் தனது முத்திரையைப் பதித்து வருகிறார். தமிழகத்தின் பல்வேறு மாவட்டங்களில் நடைபெற்ற விளையாட்டுப் போட்டிகளில் பங்கேற்று மாவட்ட, மாநில மற்றும் தேசிய அளவிலான ஏராளமான விருதுகளையும் பதக்கங்களையும் வென்று சாதனைப் பட்டியலை நீட்டித்துள்ளார். இவரது இந்தப் பன்முகத் திறமையை அங்கீகரிக்கும் விதமாக, கோவையில் நடைபெற்ற ஒரு சிறப்பு நிகழ்வில் கார்த்திகுமாருக்கு “மல்டி டேலண்ட்” (Multi-Talent Award) விருது வழங்கிச் சிறப்பிக்கப்பட்டது.
அரசுப் பள்ளியில் பயின்று கொண்டு, முறையான பயிற்சியுடன் இத்தகைய சாதனைகளைப் படைத்து வரும் மாணவன் கார்த்திகுமாரைப் பள்ளித் தலைமை ஆசிரியை சுமதி மற்றும் ஆசிரியைகள், சக மாணவர்கள் நேரில் அழைத்து இனிப்புகள் வழங்கிப் பாராட்டி வாழ்த்தினர். சாதாரணக் குடும்பப் பின்னணியிலிருந்து வந்து, கடின உழைப்பால் உலக சாதனை வரை எட்டியுள்ள இந்தச் சிறுவனின் வெற்றி, மற்ற அரசுப் பள்ளி மாணவர்களுக்கும் ஒரு பெரும் தூண்டுதலாக அமைந்துள்ளது. வரும் காலங்களில் சர்வதேச அளவில் துப்பாக்கிச் சுடுதல் மற்றும் தற்காப்புக் கலைப் போட்டிகளில் பங்கேற்றுப் பதக்கங்கள் வெல்வதே தனது லட்சியம் என இந்தச் சிறு சாதனையாளர் உற்சாகத்துடன் தெரிவித்துள்ளார்.
