புதுக்கோட்டை மாவட்ட ஊரக வளர்ச்சித் துறை ஓய்வூதியர்கள் சங்கத்தின் வருடாந்திரப் பொதுக்குழு கூட்டம், மாவட்டத் தலைவர் மற்றும் ஓய்வுபெற்ற இணை இயக்குநர் கண்ணன் தலைமையில் புதுக்கோட்டை ஊராட்சி ஒன்றிய அலுவலக வளாகத்தில் எழுச்சியுடன் நடைபெற்றது. மாநிலத் தலைவர் மணிவண்ணன், துணைத் தலைவர் செந்தில்வேல் மற்றும் பொதுச்செயலாளர் முத்தையா ஆகியோர் முன்னிலை வகித்த இந்த நிகழ்வில், ஓய்வூதியர்களின் நலன்கள் மட்டுமன்றிச் சமூக மேம்பாடு மற்றும் ஜனநாயகக் கடமை குறித்த பல்வேறு முக்கிய முடிவுகள் எடுக்கப்பட்டன. ஓய்வுபெற்ற பின்னரும் சமூகப் பொறுப்புணர்வுடன் செயல்படும் இந்த அமைப்பின் செயல்பாடுகள் மாவட்ட அளவில் பெரும் கவனத்தைப் பெற்றுள்ளன.
கூட்டத்தில் சிறப்பு அழைப்பாளராகப் பங்கேற்ற ஓய்வுபெற்ற திட்ட இயக்குநரும், ஆதிசாய் ஐஏஎஸ் அகாடமி தலைவருமான ஏவிசிசி கணேசன், சங்க நிர்வாகிகளுக்குப் பொன்னாடை அணிவித்து கௌரவித்ததோடு, உறுப்பினர்களுக்குப் புத்தாண்டுப் பரிசுகளை வழங்கிச் சிறப்புரையாற்றினார். இக்கூட்டத்தில் மத்திய மற்றும் மாநில அரசுகளுக்குப் பல்வேறு கோரிக்கைகள் முன்வைக்கப்பட்டன. குறிப்பாக, நீண்ட காலக் கோரிக்கையான பழைய ஓய்வூதியத் திட்டத்தை மீண்டும் அமல்படுத்த வேண்டும், ரயில்வே துறையில் மூத்த குடிமக்களுக்கு வழங்கப்பட்டு வந்த பயணச் சலுகைகளை மீண்டும் வழங்க வேண்டும் மற்றும் புதுக்கோட்டை நாடாளுமன்றத் தொகுதியை மீண்டும் மறுசீரமைப்பு செய்து அமைக்க வேண்டும் உள்ளிட்ட தீர்மானங்கள் நிறைவேற்றப்பட்டன. மேலும், கிராமப்புறங்களில் கபடி மற்றும் ஓட்டப்பந்தயங்களில் சிறந்து விளங்கும் இளைஞர்களை ஊக்கப்படுத்தத் தேவையான நடவடிக்கைகளை அரசு எடுக்க வேண்டும் என்றும் வலியுறுத்தப்பட்டது.
இந்தக் கூட்டத்தின் மிக முக்கிய அம்சமாக, தற்போது நடைபெற்று வரும் வாக்காளர் பட்டியல் திருத்தப் பணிகளில் பொதுமக்களின் பங்களிப்பை அதிகரிக்கச் சங்கத்தின் சார்பில் முடிவெடுக்கப்பட்டது. “வாக்கு-நம் உரிமை! வாக்களிப்பது-நம் கடமை!” என்ற முழக்கத்துடன், தகுதியுள்ள அனைத்து வாக்காளர்களையும் பட்டியலில் சேர்க்கவும், முகாம்கள் குறித்த விழிப்புணர்வை ஏற்படுத்தவும் மாவட்டம் தழுவிய பிரசாரத்தை மேற்கொள்ளத் தீர்மானிக்கப்பட்டது. முன்னதாக, ஓய்வுபெற்ற இணை இயக்குநர் அழகிரிசாமி வரவேற்புரை ஆற்றினார். சங்கச் செயலாளர் மற்றும் பி.டி.ஓ கண்ணன் தீர்மானங்களை வாசிக்க, பொருளாளர் சின்னப்பா நிதிநிலை அறிக்கையைச் சமர்ப்பித்தார். முன்னாள் துணை வட்டார வளர்ச்சி அலுவலர் பெருமாள் நன்றியுரை வழங்கினார். இந்த நிகழ்வில் ஓய்வுபெற்ற உதவி இயக்குநர்கள், ஒன்றிய ஆணையர்கள், வட்டார வளர்ச்சி அலுவலர்கள் மற்றும் விசைப்பம்பு இயக்குநர்கள் என நூற்றுக்கணக்கான முன்னாள் அரசு அலுவலர்கள் திரளாகக் கலந்துகொண்டு தங்களது கருத்துகளைப் பகிர்ந்து கொண்டனர்.