வேலூர் மாவட்டம் காட்பாடி அருகே உள்ள பிரம்மபுரத்தில், வரலாற்றுச் சிறப்புமிக்க ஆன்மிகத் தலமாகவும் இயற்கை எழில் சூழ்ந்த இடமாகவும் திகழும் சஞ்சீவராயர் மலை உச்சியில், சுற்றுலாப் பயணிகளைக் கவரும் வகையில் அமைக்கப்பட்டுள்ள புதிய ‘காட்சிமுனை’ (View Point) பொதுமக்களின் பயன்பாட்டிற்காகத் திறந்து வைக்கப்பட்டது. சுமார் ரூ.93.09 லட்சம் மதிப்பீட்டில் சர்வதேசத் தரத்துடன் செதுக்கப்பட்டுள்ள இந்த நவீனக் காட்சிமுனையை வேலூர் மாவட்ட ஆட்சியர் வே.இரா. சுப்புலெட்சுமி இன்று ரிப்பன் வெட்டித் திறந்து வைத்தார்.
காட்பாடி பிரம்மபுரத்தில் அமைந்துள்ள ஸ்ரீ பிரசன்ன வெங்கடேச பெருமாள் கோயில், மிகவும் பழைமையான சுயம்புமூர்த்தி திருத்தலமாகும். மலை உச்சியில் அமைந்துள்ள இக்கோயிலுக்குச் செல்ல ஏற்கனவே சாலை வசதி மற்றும் படிக்கட்டு வசதிகள் உள்ள நிலையில், புரட்டாசி சனிக்கிழமைகள் மற்றும் விசேஷ நாட்களில் ஆயிரக்கணக்கான பக்தர்கள் இங்கு வருகை தருகின்றனர். இந்த இடத்தின் சுற்றுலாத் திறனை மேம்படுத்தும் வகையில், புதிய காட்சிமுனை அமைக்கப்பட வேண்டும் என நீர்வளத்துறை அமைச்சர் துரைமுருகன் முன்வைத்த கோரிக்கையை ஏற்று, சுற்றுலாத் துறையின் சார்பில் ரூ.1 கோடி நிதி ஒதுக்கீடு செய்யப்பட்டது.
தற்போது 100 சதவீதப் பணிகள் நிறைவடைந்துள்ள இந்தக் காட்சிமுனை குறித்து ஆட்சியர் பேசுகையில், “இந்தக் காட்சிமுனை வேலூர் மாவட்ட மக்களுக்கு ஒரு சிறந்த பொழுதுபோக்கு இடமாகவும், சமூக மையமாகவும் விளங்கும். இது இப்பகுதியின் சுற்றுச்சூழலை மேம்படுத்துவதோடு, மக்களின் சமூக ஆரோக்கியத்திற்கும் ஒரு வரப்பிரசாதமாக அமையும். மேலும், இப்பகுதியில் குடிநீர் மற்றும் நீர் வள ஆதாரங்களை மேம்படுத்தவும் உரிய நடவடிக்கைகள் எடுக்கப்பட்டுள்ளன. இயற்கை அழகை ரசிக்க வரும் சுற்றுலாப் பயணிகளுக்கு இது ஒரு மறக்க முடியாத அனுபவத்தைத் தரும்” எனத் தெரிவித்தார்.
இந்தத் திறப்பு விழாவில் காட்பாடி ஒன்றியக்குழுத் தலைவர் வே.வேல்முருகன், ஒன்றியக்குழுத் துணைத்தலைவர் எஸ்.சரவணன், ஒன்றியக்குழு உறுப்பினர் வி.இலக்கிய சந்துரு மற்றும் பிரம்மபுரம் ஊராட்சி மன்றத் தலைவர் ஜி.ராதாகிருஷ்ணன் ஆகியோர் முன்னிலை வகித்தனர். மேலும் மாநகராட்சி மாமன்ற உறுப்பினர் விமலா சீனிவாசன், வேலூர் மாவட்ட சுற்றுலா அலுவலர் (பொறுப்பு) ம.முத்துச்சாமி மற்றும் உள்ளாட்சிப் பிரதிநிதிகள், அரசு அதிகாரிகள் எனப் பலரும் கலந்து கொண்டனர். மலை உச்சியில் இருந்து வேலூர் மாநகரின் அழகை முழுமையாக ரசிக்கும் வகையில் அமைக்கப்பட்டுள்ள இந்தக் காட்சிமுனை, இனி வரும் காலங்களில் மாவட்டத்தின் முக்கியச் சுற்றுலா அடையாளமாக மாறும் என எதிர்பார்க்கப்படுகிறது.
