திருச்சி மாவட்டம் உப்பிலியபுரம் அடுத்த நாகநல்லூர் பகுதி பொதுமக்களின் பல ஆண்டுகால கோரிக்கையை ஏற்று, நவீன வசதிகளுடன் கட்டப்பட்ட புதிய நியாய விலைக் கடையைத் துறையூர் சட்டமன்ற உறுப்பினர் எஸ். ஸ்டாலின் குமார் இன்று பொதுமக்களின் பயன்பாட்டிற்காகத் திறந்து வைத்தார். நாகநல்லூர் கிராமத்தில் கடந்த பல ஆண்டுகளாகப் போதிய இடவசதி இல்லாத வாடகைக் கட்டிடத்திலேயே ரேஷன் கடை இயங்கி வந்தது. இதனால் பொதுமக்கள் பொருட்கள் வாங்க வரிசையில் நிற்கும்போது கடும் சிரமத்திற்கு உள்ளாகி வந்தனர். தங்களுக்கு எனச் சொந்தக் கட்டிடத்தில் ரேஷன் கடை அமைத்துத் தர வேண்டும் என அப்பகுதி மக்கள் துறையூர் எம்எல்ஏ ஸ்டாலின் குமாரிடம் தொடர்ந்து கோரிக்கை விடுத்து வந்தனர்.
மக்களின் நியாயமான கோரிக்கையை ஏற்று, தமிழக அரசின் கவனத்திற்குக் கொண்டு சென்ற எம்எல்ஏ ஸ்டாலின் குமார், தனது துறையூர் சட்டமன்றத் தொகுதி மேம்பாட்டு நிதியிலிருந்து (MLACDS) இதற்காக ரூ.13.33 லட்சம் நிதி ஒதுக்கீடு செய்தார். இதனைத் தொடர்ந்து கட்டுமானப் பணிகள் விரைவாக முடிக்கப்பட்டு, இன்று அதன் திறப்பு விழா மிகச் சிறப்பாக நடைபெற்றது. விழாவிற்குத் தலைமை தாங்கிய எம்எல்ஏ ஸ்டாலின் குமார், புதிய கட்டிடத்தின் ரிப்பனை வெட்டித் திறந்து வைத்தார். பின்னர், அங்கிருந்த மின்னணு தராசு மற்றும் பதிவேடுகளை ஆய்வு செய்த அவர், பொதுமக்களுக்குக் குடும்ப அட்டை மூலம் அரிசி, சர்க்கரை உள்ளிட்ட அத்தியாவசியப் பொருட்களை வழங்கி விற்பனையைத் தொடங்கி வைத்தார்.
சொந்தக் கட்டிடம் கிடைத்துள்ளதால் இனி தங்குதடையின்றி, பாதுகாப்பான முறையில் பொருட்களைப் பெற்றுக்கொள்ளலாம் என நாகநல்லூர் கிராம மக்கள் மகிழ்ச்சி தெரிவித்துள்ளனர். மேலும், பொதுமக்களின் அடிப்படைத் தேவைகளான குடிநீர், சாலை வசதி மற்றும் மின்விளக்கு வசதிகளை முன்னுரிமை அடிப்படையில் தனது தொகுதி நிதி மூலம் நிறைவேற்றி வருவதாக எம்எல்ஏ ஸ்டாலின் குமார் இதன்போது தெரிவித்தார். இந்த நிகழ்ச்சியில் உள்ளாட்சி பிரதிநிதிகள், கூட்டுறவுத் துறை அதிகாரிகள், திமுக கட்சி நிர்வாகிகள் மற்றும் பொதுமக்கள் என ஏராளமானோர் கலந்து கொண்டு சிறப்பித்தனர்.