கோவை மாநகரில் சமூகப் பொறுப்புணர்வுடன் கூடிய ஒரு சிறப்பான முன்னெடுப்பாக, சமுதாயத்தில் மிகப்பெரிய மாற்றங்களை ஏற்படுத்திய வரலாற்றுத் தலைவர்கள் மற்றும் மக்கள் மனங்களில் நீங்கா இடம் பிடித்த சாதனையாளர்களை நினைவுபடுத்தும் வகையில், அவர்களது புகைப்படங்கள் அச்சிடப்பட்ட காலண்டர்களை வழங்கும் நிகழ்ச்சி சிறப்பாக நடைபெற்றது. கோவை குனியமுத்தூர் பகுதியைச் சேர்ந்த ஏ.எம்.டி (AMT) சென்ட்ரிங் மெட்டீரியல்ஸ் நிறுவன உரிமையாளர்கள் பொன்னுசாமி மற்றும் துரை ஆகியோர் தலைமையில் நடைபெற்ற இந்த நிகழ்வில், கோவை மத்திய ரயில் நிலையப் பகுதியில் பணிபுரியும் ஆட்டோ மற்றும் கார் ஓட்டுநர்கள், சிறு வணிகர்கள் மற்றும் பொதுமக்களுக்கு சுமார் 500-க்கும் மேற்பட்ட சிறிய ரக காலண்டர்கள் வழங்கப்பட்டன. புத்தாண்டு மற்றும் விழா காலத்தை முன்னிட்டு நடைபெற்ற இந்த நிகழ்வில், காலண்டர்களுடன் இனிப்புகள், மாணவர்களுக்கான நோட்டுப் புத்தகங்கள் மற்றும் எழுதுபொருட்களும் வழங்கப்பட்டு மகிழ்ச்சி பகிரப்பட்டது.
இந்த உன்னத முயற்சி குறித்து ஏ.எம்.டி நிறுவன உரிமையாளர் பொன்னுசாமி பேசுகையில், இதற்கான பின்னணி குறித்து உருக்கமாகத் தெரிவித்தார். கடந்த 2021-ஆம் ஆண்டு டிசம்பர் 8-ஆம் தேதி, நீலகிரி மாவட்டம் வெலிங்டன் முப்படை அதிகாரிகள் பயிற்சி கல்லூரிக்குச் செல்லும் வழியில் நிகழ்ந்த ஹெலிகாப்டர் விபத்தில், நாட்டின் முதல் முப்படை தலைமைத் தளபதி பிபின் ராவத் உயிரிழந்த நிகழ்வு தேசத்தையே உலுக்கியது. அவரது வீரத்தையும் தியாகத்தையும் போற்றும் வகையில், அவரது உருவம் பதித்த காலண்டர்களைத் தயாரித்துத் தூய்மைப் பணியாளர்களுக்கு வழங்கத் தொடங்கியதே இந்த அறப்பணியின் தொடக்கமாகும். தற்போது நான்கு ஆண்டுகளாகத் தொடர்ந்து நடைபெற்று வரும் இத்திட்டத்தில், இந்த ஆண்டு நாட்டின் சுதந்திரத்திற்காகப் போராடிய வ.உ.சிதம்பரனார், ஆன்மீகச் சுடர் விவேகானந்தர், பசும்பொன் முத்துராமலிங்க தேவர், கல்விக்கண் திறந்த காமராஜர், ஏவுகணை நாயகன் ஏ.பி.ஜே.அப்துல் கலாம் ஆகியோரின் படங்கள் இடம்பெற்றுள்ளன.
மேலும், மக்கள் திலகம் எம்.ஜி.ஆர், மறைந்த முதல்வர் ஜெயலலிதா, தொழிலதிபர் ரத்தன் டாடா, தேமுதிக தலைவர் விஜயகாந்த், சமூக விழிப்புணர்வு கலைஞர் விவேக் மற்றும் சமூகப் பணிகளில் ஆர்வம் காட்டி வரும் நடிகர் லாரன்ஸ், கேபிஒய் பாலா ஆகியோரின் புகைப்படங்கள் அச்சிடப்பட்ட காலண்டர்கள், பொதுப் போக்குவரத்து வாகனங்களான பேருந்துகள் மற்றும் வாடகை வாகனங்களில் ஒட்டப்பட்டு விழிப்புணர்வு ஏற்படுத்தப்பட்டது. இதன் மூலம் அன்றாடம் வாகனங்களில் பயணிக்கும் பொதுமக்கள், இத்தலைவர்களின் சாதனைகளை நினைவுகூர்ந்து உத்வேகம் பெற முடியும் என்பதே இந்த அமைப்பினரின் நோக்கமாகும்.
லோகேஷ், சந்தோஷ், மணிகண்டன், நாசர், ஹரிஹரன், சஞ்சய், நரேஷ், அஜய் மற்றும் கண்ணன் ஆகிய இளைஞர்களின் தன்னார்வ முயற்சியில் இந்த நிகழ்வு மிகக் கோலாகலமாக ஒருங்கிணைக்கப்பட்டது. ஒரு தனிநபரின் நினைவு தினத்தைத் தொடங்கி, இன்று ஒரு சமூக இயக்கமாக மாறி, வரும் தலைமுறைக்குத் தலைவர்களின் வரலாற்றைக் கொண்டு செல்லும் இந்த முயற்சியைக் கோவை மக்கள் மற்றும் வாகன ஓட்டுநர்கள் வெகுவாகப் பாராட்டி வருகின்றனர்.