டொனால்டு ட்ரம்புவுக்கு நோபல் பரிசு – அமெரிக்கா பரிந்துரை !
உலகம் முழுவதும் மருத்துவம், இயற்பியல், வேதியியல், பொருளாதாரம், அமைதி மற்றும் இலக்கியம் ஆகிய ஆறு துறைகளில் சிறந்த சாதனையாளர்களுக்கு ஆண்டுதோறும் நோபல் பரிசுகள் வழங்கப்பட்டு வருகின்றன. இந்த பரிசுகள் ஸ்வீடனில் பிறந்த விஞ்ஞானி ஆல்பிரட் நோபலின் நினைவாக வழங்கப்படுகின்றன.
இந்தப் பின்னணியில், அமெரிக்காவின் அதிபர் டொனால்டு ட்ரம்புக்கு அமைதிக்கான நோபல் பரிசு வழங்க பரிந்துரை செய்யப்பட்டுள்ளது. கடந்த ஆண்டுகளில், இந்தியா – பாகிஸ்தான் இடையிலான பதற்றங்களை குறைத்தது தொடர்பாக தனது முயற்சிகள் காரணமாக, ட்ரம்ப் பலமுறை தன்னை இந்த பரிசுக்கு தகுதியானவர் எனக் கூறியிருந்தார். ஆனால் இந்தியா, அவரது உரைகளை மறுக்கின்ற நிலையில் இருந்தது.
அமெரிக்கா சென்றிருந்த பாகிஸ்தான் ராணுவத் தலைவர் அசிம் மூனீர், இந்தியா – பாகிஸ்தான் இடையிலான அமைதிப் பேச்சுவார்த்தைக்கு ட்ரம்ப் செய்த முயற்சியை அடிப்படையாகக் கொண்டு, அவருக்கு நோபல் பரிசு வழங்கலாம் என பரிந்துரை செய்துள்ளார். இதையடுத்து, ட்ரம்புக்கு நோபல் பரிசு வழங்கும் பரிந்துரை சமூக ஊடகங்களில் பரவலாக பேசப்பட்டு வருகிறது.
இந்த விவகாரத்தில் கருத்து தெரிவித்த ட்ரம்ப், “நான் நான்கு அல்லது ஐந்து முறை இந்த பரிசை பெற வேண்டியவனாக இருந்தேன். ஆனால் அவர்கள் எனக்கு வழங்க மாட்டார்கள். ஏனெனில், அவர்கள் இந்த பரிசை தாராளவாதிகளுக்கு மட்டுமே வழங்குகிறார்கள்” என விமர்சித்தார்.
புதிய பரிந்துரை எங்கே இருந்து வந்தது என்பதைப்பற்றி, அமெரிக்க குடியரசு கட்சியைச் சேர்ந்த பாராளுமன்ற உறுப்பினர் பட்டி கார்ட்டர், 2025ஆம் ஆண்டுக்கான அமைதிக்கான நோபல் பரிசுக்காக ட்ரம்பின் பெயரை அதிகாரப்பூர்வமாக பரிந்துரை செய்துள்ளார். “இஸ்ரேலுக்கும் ஈரானுக்கும் இடையிலான மோதலுக்கு முடிவுகாண செய்ததில் ட்ரம்பின் பங்கு வரலாற்றுப் பரிமாணம் கொண்டது” என அவர் எழுதிய கடிதத்தில் குறிப்பிடப்பட்டுள்ளது.
எனினும், ஒரு நபர் பரிந்துரைக்கப்படுவதால் அவருக்கு பரிசு கிடைக்கும் என உறுதி செய்ய முடியாது. ஆண்டுதோறும் நூற்றுக்கணக்கான பெயர்கள் பரிந்துரைக்கப்படுகின்றன. நோபல் குழு இந்த பரிந்துரைகளை தனிப்பட்ட முறையில் பரிசீலித்து, அக்டோபர் மாதம் வெற்றியாளர்களை அறிவிக்கிறது.
இதுவரை அமைதிக்கான நோபல் பரிசை பெற்ற அமெரிக்க அதிபர்களில், தியோடர் ரூஸ்வெல்ட் (1906), உட்ரோ வில்சன் (1919) மற்றும் பராக் ஒபாமா (2009) ஆகியோர் மட்டுமே உள்ளனர்.
