நாமக்கல் மாவட்டம் ராசிபுரத்தில், அனைத்திந்திய அண்ணா திராவிட முன்னேற்றக் கழகத்தின் நிறுவனரும், தமிழக முன்னாள் முதலமைச்சருமான ‘புரட்சித்தலைவர்’ எம்.ஜி.ஆரின் 109-வது பிறந்தநாள் விழா அதிமுக மற்றும் அமமுக ஆகிய இரு கட்சிகளின் சார்பில் நகரின் பல்வேறு இடங்களில் மிகச் சிறப்பாகக் கொண்டாடப்பட்டது. ராசிபுரம் நகர அதிமுக சார்பில் புதிய பேருந்து நிலையப் பகுதியில் அமைந்துள்ள எம்.ஜி.ஆரின் முழு உருவச் சிலைக்கு, நகரச் செயலாளர் எம்.பாலசுப்பிரமணியம் தலைமையில் மாலை அணிவித்து, மலர் தூவி மரியாதை செலுத்தப்பட்டது. இதனைத் தொடர்ந்து, தொண்டர்கள் பட்டாசுகள் வெடித்தும், முழக்கங்கள் எழுப்பியும் தங்களது மகிழ்ச்சியை வெளிப்படுத்தினர். விழாவின் முக்கிய நிகழ்வாக, பேருந்து நிலையத்திற்கு வருகை தந்த பயணிகள் மற்றும் பொதுமக்களுக்கு இனிப்புகள் வழங்கிக் கொண்டாடப்பட்டது.
ராசிபுரம் நகராட்சிக்கு உட்பட்ட 27 வார்டுகளிலும் எம்.ஜி.ஆர் பிறந்தநாள் விழா கோலாகலமாக அரங்கேறியது. நகரின் 35-க்கும் மேற்பட்ட முக்கிய இடங்களில் எம்.ஜி.ஆரின் உருவப்படங்கள் அலங்கரித்து வைக்கப்பட்டு, அந்தந்த பகுதி அதிமுக நிர்வாகிகள் மலர் அஞ்சலி செலுத்தினர். பல இடங்களில் ஏழை எளிய மக்களுக்கு அன்னதானமும், நலத்திட்ட உதவிகளும் வழங்கப்பட்டன. இந்த நிகழ்ச்சிகளில் அதிமுக மாவட்ட அவைத்தலைவர் எஸ்.பி.கந்தசாமி, வழக்கறிஞர்கள் கே.பி.சுரேஷ், பிரபு, பூபதி, முன்னாள் நகர்மன்றத் துணைத்தலைவர் எஸ்.வெங்கடாசலம் உள்ளிட்ட முக்கிய நிர்வாகிகள் பங்கேற்றனர். மேலும், எம்.ஜி.ஆர் இளைஞரணி நகரச் செயலாளர் ஆர்.பி. சீனிவாசன், நகர்மன்ற உறுப்பினர் மகாலட்சுமி, அண்ணா தொழிற்சங்கச் செயலாளர் ஆட்டோ எஸ்.சீனிவாசன் மற்றும் மகளிர் அணியைச் சேர்ந்த ஹேமலதா, மகேஸ்வரி உள்ளிட்ட ஏராளமான தொண்டர்கள் கலந்துகொண்டு சிறப்பித்தனர்.
இதேபோல், நாமக்கல் வடக்கு மாவட்ட அமமுக சார்பில் ராசிபுரம் புதிய பேருந்து நிலையம் முன்பாக எம்.ஜி.ஆரின் அலங்கரிக்கப்பட்ட உருவப்படத்திற்கு மலர் அஞ்சலி செலுத்தப்பட்டது. மாவட்ட அமமுக செயலாளர் ஏ.பி.பழனிவேல் தலைமையில் நடைபெற்ற இந்த விழாவில், திரளான தொண்டர்கள் கலந்துகொண்டு ‘மக்கள் திலகத்தின்’ புகழைப் போற்றும் வகையில் மரியாதை செய்தனர். இந்நிகழ்வில் பொதுமக்களுக்கு இனிப்புகள் விநியோகிக்கப்பட்டதுடன், மாவட்ட அவைத்தலைவர் எஸ்.பன்னீர்செல்வம், மாவட்டப் பொருளாளர் வழக்கறிஞர் பி.அன்பு செழியன், மாவட்ட இணைச்செயலாளர் இ.கே.திலகம் மற்றும் பொதுக்குழு உறுப்பினர் டி.உதயகுமார் ஆகியோர் முன்னிலை வகித்தனர். ராசிபுரம் நகரமே விழாக்கோலம் பூணும் வகையில் அமைந்த இந்த நிகழ்வுகள், எம்.ஜி.ஆர் இன்றும் மக்கள் மனங்களில் நீங்கா இடம் பெற்றுள்ளார் என்பதைப் பறைசாற்றுவதாக அமைந்தது.
