இயேசு கிறிஸ்துவின் பிறப்பை முன்னிட்டு, தஞ்சை அடைக்கல அன்னை சபையில் இந்து, முஸ்லிம் மற்றும் கிறிஸ்தவ சமூகங்கள் ஒன்றிணைந்து கொண்டாடிய ‘பல்சமயக் கிறிஸ்துமஸ் விழா’ சமூக நல்லிணக்கத்திற்குச் சான்றாக அமைந்தது. தஞ்சை அருளானந்த நகர் பகுதியில் செயல்பட்டு வரும் அடைக்கல அன்னை சபையில், ஆண்டுதோறும் கிறிஸ்துமஸ் பெருவிழா விமரிசையாகக் கொண்டாடப்படுவது வழக்கம். இந்த ஆண்டு, ‘பல்சமயக் கிறிஸ்துமஸ் கொண்டாட்டம்’ என்ற பெயரில் அனைத்து மதத்தினரையும் உள்ளடக்கிய ஒரு பிரம்மாண்ட விழாவிற்கு ஏற்பாடு செய்யப்பட்டிருந்தது. உலகெங்கும் அமைதியையும் அன்பையும் போதித்த இயேசுவின் பிறப்பை, மதப் பாகுபாடின்றி அனைவரும் இணைந்து கொண்டாடினர்.
அடைக்கல அன்னை சபையின் தலைமை அன்னை மரிய பிலோமி தலைமையில் நடைபெற்ற இவ்விழாவிற்கு, மாநிலத் தலைமைச் சகோதரி ஜெசிந்தா மேரி வரவேற்புரை ஆற்றினார். விழாவில் சிறப்பு அழைப்பாளர்களாகப் பல்வேறு அமைப்புகளைச் சேர்ந்த தலைவர்கள் பங்கேற்றனர்:சென் பீட்டர்ஸ் சபையின் தலைக்குரு பீட்டர் ரெத்தினம் ஸ்ரீ ராமகிருஷ்ணா மடம் தலைவர் விமூர்த்தானந்தர் சிறுபான்மை மக்கள் நலக்குழு துணைத் தலைவர் ஜாகிர் உசேன் தொன்போஸ்கோ மெட்ரிக் பள்ளித் தாளாளர் சுரேஷ் இடதுசாரிகள் பொதுமேடை செந்தில்குமார்
சிறப்பு அழைப்பாளர்கள் உரையாற்றுகையில், “இயேசு கிறிஸ்துவின் பிறப்பு என்பது ஒரு மதத்திற்குள்ளானது மட்டுமல்ல; அது மனிதநேயம் மற்றும் சமூக ஒருமைப்பாட்டிற்கான அடையாளம். இத்தகைய பல்சமயக் கூடல்கள் மூலம் மக்களிடையே அன்பு மேலோங்கும்” எனச் சமூக நல்லிணக்கத்தின் அவசியத்தை விளக்கினர். விழாவின் ஒரு பகுதியாகப் பள்ளி மாணவ, மாணவிகளின் கண்கவர் கலை நிகழ்ச்சிகள் நடைபெற்றன. கிறிஸ்துமஸ் பாடல்களுக்கு ஏற்ப ஆடிய குழு நடனம் மற்றும் இயேசுவின் பிறப்பைச் சித்தரிக்கும் நாடகம் அனைவரையும் கவர்ந்தது. குறிப்பாக, சபையின் வெளிப்புற வளாகத்தில் அமைக்கப்பட்டிருந்த பிரம்மாண்ட கிறிஸ்துமஸ் குடில் அனைவரின் கவனத்தையும் ஈர்த்தது.
நிறைவாக, பான் செக்கர்ஸ் மகளிர் கல்லூரி முதல்வர் சகோதரி விக்டோரியா, சிறப்பு அழைப்பாளர்களின் உரைகளைத் தொகுத்து வழங்கி அனைவருக்கும் நன்றி கூறினார். தஞ்சை மாநகரில் மதங்களைக் கடந்து மனிதநேயம் போற்றப்பட்ட இந்தத் தருணம், விழாவிற்கு வந்திருந்தவர்களிடையே நெகிழ்ச்சியை ஏற்படுத்தியது.
