நீலகிரி மாவட்டம் பந்தலூர் தாலுகா நெல்லியம்பதி மற்றும் சீபுண்டி பகுதிகளில் கடந்த பத்து நாட்களுக்கும் மேலாக முகாமிட்டுள்ள 15-க்கும் மேற்பட்ட யானைகள் கொண்ட கூட்டம், விவசாய பயிர்களைக் கடுமையாகச் சேதப்படுத்தி வருவதால் பொதுமக்கள் மற்றும் விவசாயிகள் பெரும் அச்சத்தில் ஆழ்ந்துள்ளனர். இப்பகுதியில் முதுமலை வனப்பகுதியிலிருந்து மாற்றுத் திட்டத்தின் கீழ் குடியமர்த்தப்பட்ட மவுண்ட்டாடன் செட்டி சமுதாய மக்கள் வாழ்ந்து வருகின்றனர். இவர்கள் தங்கள் வாழ்வாதாரத்திற்காகப் பயிரிட்டுள்ள வாழை, இஞ்சி மற்றும் மேரக்காய் போன்ற பயிர்களை யானைகள் இரவோடு இரவாகத் தின்று தீர்ப்பதுடன் மிதித்துச் சேதப்படுத்தி வருகின்றன.
யானை தொல்லை குறித்துப் பாதிக்கப்பட்ட பகுதிகளில் ஆய்வு செய்த கூடலூர் சட்டமன்ற உறுப்பினர் பொன். ஜெயசீலன் தலைமையில் ஆலோசனைக் கூட்டம் நடத்தப்பட்டது. இக்கூட்டத்தில் பேசிய கிராம மக்கள், கடந்த 10 நாட்களில் மட்டும் சுமார் 5 லட்சம் ரூபாய் மதிப்பிலான விவசாய பயிர்கள் யானைகளால் அழிக்கப்பட்டுள்ளதாக வேதனையுடன் தெரிவித்தனர். இரவு நேரங்களில் வீடுகளை விட்டு வெளியே வர முடியாத அளவிற்கு யானைகளின் நடமாட்டம் அதிகரித்துள்ளதால், தங்கள் உயிருக்கும் உடமைக்கும் பாதுகாப்பு இல்லாத சூழல் நிலவுவதாக அவர்கள் முறையிட்டனர்.
ஆய்விற்குப் பின் செய்தியாளர்களிடம் பேசிய எம்.எல்.ஏ. ஜெயசீலன், “குடியிருப்புப் பகுதிகளில் புகுந்துள்ள யானைகளை உடனடியாக அடர்ந்த வனப்பகுதிக்குள் விரட்ட வனத்துறை நடவடிக்கை எடுக்க வேண்டும். நவீன ட்ரோன் கேமராக்கள் மூலம் யானைகளின் நடமாட்டத்தைக் கண்காணித்து, தேவையெனில் கும்கி யானைகளின் உதவியுடன் அவற்றை ஊருக்குள் வராதவாறு அப்புறப்படுத்த வேண்டும். இது தொடர்பாக மாவட்ட ஆட்சியர் மற்றும் வனத்துறை உயரதிகாரிகளிடம் வலியுறுத்தப்படும். உரிய நடவடிக்கை எடுத்து விவசாயிகளுக்கு இழப்பீடு வழங்காவிட்டால், பொதுமக்களைத் திரட்டித் தொடர் முற்றுகைப் போராட்டங்கள் நடத்தப்படும்,” என எச்சரித்தார்.
இந்த ஆலோசனைக் கூட்டத்தில் அதிமுக நிர்வாகிகள் மற்றும் ஏராளமான கிராம மக்கள் கலந்துகொண்டு, வனத்துறையினர் நிரந்தரப் பாதுகாப்புப் பணியில் ஈடுபட வேண்டும் என வலியுறுத்தினர். யானை – மனித மோதல் இப்பகுதியில் நாளுக்கு நாள் அதிகரித்து வருவது நீலகிரி மாவட்ட மலைக்கிராம மக்களிடையே பெரும் கொந்தளிப்பை ஏற்படுத்தியுள்ளது.