குஜராத் மாநிலத்தின் ஆனந்த் மற்றும் வதோதரா மாவட்டங்களை இணைக்கும் வகையில் மாஹி ஆற்றின் மீது அமைந்திருந்த கம்பீரா – முக்பூர் பாலத்தின் ஒரு பகுதி இன்று காலை திடீரென இடிந்து விழுந்தது. இதில் ஆற்றில் பல வாகனங்கள் கவிழ்ந்தன. இந்த பரிதாபகரமான விபத்தில் தற்போது வரை 10 பேர் உயிரிழந்துள்ளதாக அதிகாரிகள் தெரிவித்துள்ளனர்.
விபத்து இன்று காலை 7.30 மணியளவில் வதோதராவின் பாத்ரா தாலுகா பகுதியில் ஏற்பட்டது. இரண்டு தூண்களுக்கு இடையிலான பாலத்தின் ஒரு ஸ்லாப் திடீரென முறிந்து விழுந்தது. இதன் காரணமாக, அந்த வழியாக சென்றதாக கூறப்படும் ஐந்து முதல் ஆறு வாகனங்கள் நேரடியாக ஆற்றில் விழுந்தன.
உள்துறை அமைச்சர் ஹர்ஷ் சங்கவி, “இன்று காலை சம்பவம் நடந்தவுடன் முதலமைச்சர் தலைமையில் உயர்மட்டக் குழு சம்பவ இடத்துக்கு அனுப்பப்பட்டு உள்ளது. இதுவரை 9 உயிரிழந்தவர்களின் உடல்கள் மீட்கப்பட்டுள்ளன. மேலும், 6 பேர் உயிருடன் மீட்கப்பட்டுள்ளனர்,” என்று தெரிவித்தார்.
சுகாதார அமைச்சர் ரிஷிகேஷ் படேல், “மத்திய குஜராத் மற்றும் சௌராஷ்டிராவை இணைக்கும் முக்கிய பாலமாக இருந்தது இது. தற்போது அந்த வழியில் போக்குவரத்து நிறுத்தப்பட்டுள்ளது. மாற்று வழிகள் அமைக்கப்பட்டுள்ளன,” எனக் கூறினார்.
இந்நிலையில், விபத்தில் உயிரிழந்தவர்களின் குடும்பங்களுக்கு பிரதமர் நரேந்திர மோடி தனது இரங்கலை தெரிவித்துள்ளார். மேலும், உயிரிழந்தோரின் குடும்பங்களுக்கு பிரதமரின் நிவாரண நிதியிலிருந்து ரூ.2 லட்சம் மற்றும் காயமடைந்தவர்களுக்கு தலா ரூ.50,000 வழங்கப்படும் என்றும் அறிவிக்கப்பட்டுள்ளது.
மேலும் விசாரணை நடைபெற்று வருகிறது.
