மத்திய அரசு தேசிய ஊரக வேலை உறுதித் திட்டத்தில் மகாத்மா காந்தியின் பெயரை நீக்கியதைக் கண்டித்தும், அத்திட்டத்தில் கொண்டு வரப்பட்டுள்ள மாற்றங்களைத் திரும்பப் பெற வலியுறுத்தியும், தேனி மாவட்டத்தின் அனைத்து ஊராட்சி ஒன்றிய அலுவலகங்கள் மற்றும் முக்கியச் சந்திப்புகளில் திமுக தலைமையிலான கூட்டணி கட்சிகள் சார்பில் மாபெரும் கண்டன ஆர்ப்பாட்டங்கள் நடைபெற்றன. கம்பம், உத்தமபாளையம் மற்றும் சின்னமனூர் ஆகிய இடங்களில் நடைபெற்ற போராட்டங்களில் நூற்றுக்கணக்கான தொண்டர்கள் பங்கேற்று மத்திய அரசுக்கு எதிராக முழக்கமிட்டனர். சின்னமனூரில் சட்டமன்ற உறுப்பினர் ராமகிருஷ்ணன் தலைமையிலும், உத்தமபாளையத்தில் கொள்கை பரப்பு துணைச் செயலாளர் பாண்டியன் தலைமையிலும், கம்பத்தில் முன்னாள் சட்டமன்ற உறுப்பினர் ஆசையன் தலைமையிலும் ஆர்ப்பாட்டங்கள் எழுச்சியுடன் நடைபெற்றன. இதில் காங்கிரஸ், இடதுசாரிகள், விசிக, இமுலீக் மற்றும் தமுமுக உள்ளிட்ட கூட்டணிக் கட்சி நிர்வாகிகள் திரளாகக் கலந்துகொண்டனர்.
பெரியகுளம் பகுதியில் ஜெயமங்கலம் ஊராட்சி அலுவலகம் முன்பு நடைபெற்ற போராட்டத்திற்குச் சட்டமன்ற உறுப்பினர் சரவணக்குமார் தலைமை வகித்தார். தொகுதிப் பொறுப்பாளர் முத்துராமலிங்கம், வடக்கு ஒன்றிய செயலாளர் பாண்டியன், நகர செயலாளர் முகமது இலியாஸ் ஆகியோர் முன்னிலை வகித்தனர். விசிக கிழக்கு மாவட்ட செயலாளர் ரபீக், மக்கள் நீதி மய்யம் மாவட்ட செயலாளர் ஐயப்பன் உள்ளிட்ட கூட்டணிக் கட்சிப் பிரதிநிதிகள், அடித்தட்டு மக்களின் வாழ்வாதாரத்தைப் பாதிக்கும் மத்திய அரசின் நடவடிக்கைகளைக் கடுமையாக விமர்சித்துப் பேசினர். இதேபோல் போடி நாயக்கனூர் அருகே சில்லமரத்துப்பட்டியில் நடைபெற்ற ஆர்ப்பாட்டத்திற்குத் தேனி வடக்கு மாவட்ட திமுக செயலாளர் தங்க தமிழ்ச்செல்வன் தலைமை தாங்கி, ஒன்றிய அளவில் திட்டங்களை முடக்கும் முயற்சியை முறியடிக்க வேண்டும் என வலியுறுத்தினார்.
போடி மேற்கு ஒன்றிய செயலாளர் லட்சுமணன், கிழக்கு ஒன்றிய செயலாளர் ஐயப்பன் ஆகியோர் முன்னிலை வகித்த இந்த நிகழ்வில், மாவட்ட காங்கிரஸ் துணைத் தலைவர் சன்னாசி, இ.கம்யூ. மாவட்ட செயலாளர் பெருமாள், மா.கம்யூ. தாலுகா செயலாளர் முனீஸ்வரன், மதிமுக மாவட்ட செயலாளர் ராமகிருஷ்ணன் உள்ளிட்ட பலர் பங்கேற்றனர். ஆண்டிபட்டி ஊராட்சி ஒன்றிய அலுவலகம் முன்பாக நடைபெற்ற போராட்டத்திற்கு முன்னாள் நாடாளுமன்ற உறுப்பினர் செல்வேந்திரன் தலைமை வகித்தார். இதில் சட்டமன்ற உறுப்பினர் மகாராஜன் மற்றும் மார்க்சிஸ்ட் கம்யூனிஸ்ட் கட்சியின் முன்னாள் சட்டமன்ற உறுப்பினர் பாலபாரதி ஆகியோர் கலந்துகொண்டு சிறப்புரையாற்றினர்.
கடமலைக்குண்டு – மயிலாடும்பாறை ஊராட்சி ஒன்றிய அலுவலகத்தில் நடைபெற்ற ஆர்ப்பாட்டத்தில் திமுக மாநில தீர்மானக் குழு உறுப்பினர் ஜெயக்குமார் தலைமையில் திரளானோர் பங்கேற்றனர். மாவட்டம் முழுவதும் நடைபெற்ற இந்த தொடர் போராட்டங்களில், 100 நாள் வேலைத் திட்டத்தின் மாண்பைச் சிதைக்கும் வகையில் மகாத்மா காந்தியின் பெயரை நீக்கியது தேசத் தலைவர்களை அவமதிக்கும் செயல் என்றும், நிதி ஒதுக்கீட்டைக் குறைத்து திட்டத்தை முடக்கப் பார்ப்பது வன்மையாகக் கண்டிக்கத்தக்கது என்றும் தீர்மானங்கள் முன்வைக்கப்பட்டன. தேனி மாவட்டத்தின் அனைத்து ஒன்றியங்களிலும் ஒரே நேரத்தில் நடைபெற்ற இந்த அறப்போராட்டம், அரசியல் வட்டாரத்தில் பெரும் பரபரப்பை ஏற்படுத்தியது.
