தாராபுரம் :
“திமுக ஆட்சியில் ஒரே குடும்பத்தைச் சேர்ந்த நான்கு முதல்வர்கள் உள்ளனர். மக்கள் எப்படிச் சகித்துக் கொள்வார்கள்?” என்று அதிமுக பொதுச் செயலாளர் எடப்பாடி கே. பழனிசாமி கேள்வி எழுப்பினார்.
மடத்துக்குளம் தொகுதி தாராபுரம் காவல் நிலையம் அருகே நடைபெற்ற “மக்களைக் காப்போம் – தமிழகத்தை மீட்போம்” எழுச்சிப் பயண பொதுக்கூட்டத்தில் அவர் பேசியதாவது:
திமுக கூட்டணி வெற்றி பெறும் என முதல்வர் மு.க. ஸ்டாலின் கூறி வருவதாகக் கண்டித்த அவர், “மக்கள் பலத்தையே நம்பி அதிமுக தனித்து நிற்கிறது. ஆனால் திமுக மக்கள் பலத்தை நம்பாமல் கூட்டணியை மட்டுமே நம்புகிறது” என்றார்.
“ஊழல், குடும்ப ஆட்சி மட்டுமே”
திமுக ஆட்சியில் ஊழல் மட்டுமே நடைபெறுவதாக குற்றம்சாட்டிய எடப்பாடி பழனிசாமி,
“52 மாதங்களில் தாராபுரத்திற்கு எந்த பெரிய திட்டமும் கொண்டுவரப்படவில்லை.
திமுக அரசு ‘கலெக்ஷன் – கமிஷன் – கரப்ஷன்’ ஆட்சியாக மாறியுள்ளது.
குடும்ப ஆட்சி காரணமாக ஸ்டாலின், உதயநிதி, மருமகன் சபரீசன், துர்கா ஸ்டாலின் என நான்கு முதல்வர்கள் செயல்படுகிறார்கள்” என கூறினார்.
டாஸ்மாக் ஊழல் குற்றச்சாட்டு
டாஸ்மாக் மூலம் பெரும் அளவில் ஊழல் நடைபெறுவதாக குற்றம் சாட்டிய அவர், “ஒரு பாட்டிலுக்கு 10 ரூபாய் கூடுதல் வசூலிப்பதால் வருடத்துக்கு 5400 கோடி ரூபாய் வரை குவிக்கப்பட்டுள்ளது. நான்கு ஆண்டுகளில் 22 ஆயிரம் கோடி ரூபாய் கொள்ளையடிக்கப்பட்டுள்ளது” என்றார்.
விலைவாசி, வரி உயர்வு
மின்சார கட்டணம், குடிநீர் வரி, வீட்டு வரி, கடை வரி உள்ளிட்ட அனைத்திலும் 100% முதல் 150% வரை உயர்வு ஏற்பட்டுள்ளதாகவும், மளிகை பொருட்கள், கட்டுமானப் பொருட்களின் விலையேற்றம் மக்களை கடுமையாக பாதித்துள்ளதாகவும் தெரிவித்தார்.
போதைப்பொருள் பிரச்சனை
மாநிலம் முழுவதும் போதைப்பொருள் விற்பனை அதிகரித்திருப்பதாகவும், அதில் திமுகவினரின் ஈடுபாடு இருப்பதால் காவல்துறை நடவடிக்கை எடுக்க முடியாத நிலை ஏற்பட்டுள்ளதாகவும் பழனிசாமி குற்றஞ்சாட்டினார்.
அதிமுக ஆட்சியில் மீண்டும் அமல்படுத்தப்படும் திட்டங்கள்
திமுக அரசு நிறுத்திவைத்த திருமண உதவித் திட்டம், தாலிக்குத் தங்கம் திட்டம், அம்மா மினி கிளினிக், இலவச லேப்டாப் வழங்கும் திட்டம் ஆகியவை மீண்டும் அதிமுக ஆட்சிக்கு வந்தால் செயல்படுத்தப்படும் எனவும், விவசாயிகள் நலனுக்கான திட்டங்களை விரைவில் நிறைவேற்றுவோம் எனவும் அவர் உறுதியளித்தார்.
“பை பை ஸ்டாலின்”
குடியரசு மக்களுக்கு பாதுகாப்பு, குறைந்த விலைவாசி, ஊழலற்ற ஆட்சி வேண்டுமென வலியுறுத்திய அவர், “2026 தேர்தலில் திமுக ஆட்சிக்கு முடிவுக் கட்டி, பை பை ஸ்டாலின் சொல்லும் நாள் நெருங்கி விட்டது” என உரையாற்றினார்.
