அறிமுக இயக்குநர் அபிஷான் ஜீவின்ந்த் இயக்கத்தில், சசிகுமார், சிம்ரன், மிதுன் ஜெய்சங்கர், கமலேஷ், யோகி பாபு, ரமேஷ் திலக், எம். எஸ். பாஸ்கர் உள்ளிட்ட முன்னணி நட்சத்திரங்கள் நடித்துள்ள திரைப்படம் டூரிஸ்ட் ஃபேமிலி. குடும்ப ரசிகர்களை கவரும் வகையில் உருவாகியுள்ள இப்படத்தை மில்லியன் டாலர் ஸ்டுடியோஸ் மற்றும் எம் ஆர் பி என்டர்டெயின்மென்ட் தயாரித்துள்ளன.
மே 1ஆம் தேதி, சூர்யாவின் ‘ரெட்ரோ’ திரைப்படத்துடன் சேர்ந்து, டூரிஸ்ட் ஃபேமிலி திரையரங்குகளில் வெளியாகவிருக்கிறது.
திரைப்படம் வெளியாவதை முன்னிட்டு சமீபத்தில் நடைபெற்ற ப்ரீ-ரிலீஸ் நிகழ்ச்சியில், இயக்குநர் அபிஷான் ஜீவின்ந்த் உரையாற்றினார். முதல் படத்தை வெற்றிகரமாக இயக்கி, இயக்குநராக அங்கீகாரம் பெற்ற மகிழ்ச்சியில் பேசிய அவர், தன்னுடைய கடின காலங்களில் துணையாக இருந்த காதலிக்கு மேடையிலேயே ஒரு சிறப்பான சர்ப்ரைஸ் கொடுத்தார்.
அக்டோபர் 31ம் தேதி திருமணம் செய்ய விருப்பமா என நேரடியாக மேடையில் திருமண ப்ரொபோஸ் செய்த அபிஷான் ஜீவின்ந்தின் இந்த செயல் நிகழ்வில் பெரிய கவனம் பெற்றது. இந்தக் காட்சி இணையத்தில் வேகமாக வைரலாகி வருகிறது.
இந்நிகழ்ச்சியில் கலந்து கொண்ட குட் நைட் திரைப்பட இயக்குநர் விநாயக் சந்திரசேகரன் பேசும் போது,
“குட் நைட் படத்தின் தொடக்கத்தில் சந்தித்த பிரச்சனைகள், என் அண்ணன் யுவராஜ் எப்படி உறுதுணையாக இருந்தார் என்பதையும், அதன்பிறகு லவ்வர், டூரிஸ்ட் ஃபேமிலி உள்ளிட்ட படங்களை உருவாக்கிய அபிஷான் இன்று ஒரு சிறிய விதையைப் போன்று வளர்ந்து ஆலமரமாகி விட்டார். அது ஒரு பெரிய காடாகவும் வளரும்” என்று உருக்கமாக கூறினார்.
