ஜிஎஸ்டி சீர்திருத்தத்தின் மூலம் கிடைக்கும் பலன்கள் நுகர்வோரிடம் நேரடியாகச் செல்ல வேண்டும் என்று மத்திய வாணிபத் துறை அமைச்சர் பியூஷ் கோயல் வலியுறுத்தினார்.
டெல்லியில் நேற்று நடைபெற்ற 56வது ஜிஎஸ்டி கவுன்சில் கூட்டத்தில், இதுவரை இருந்த 4 அடுக்குகளை 2 அடுக்குகளாக மாற்ற முடிவு செய்யப்பட்டது. இதன்படி வரும் 22ஆம் தேதி முதல் 5 சதவீதமும், 18 சதவீதமும் ஆகிய இரண்டு விகிதங்களில் மட்டுமே ஜிஎஸ்டி வசூலிக்கப்படும். இதனால் 12 சதவீதம் மற்றும் 28 சதவீதம் என்ற விகிதங்கள் நீக்கப்பட்டுள்ளன. உப்பு முதல் கார் வரை பல்வேறு பொருட்களின் விலைகள் குறைய உள்ளதாகவும் குறிப்பிடப்பட்டுள்ளது.
இந்நிலையில் டெல்லியில் நடைபெற்ற ஒரு நிகழ்ச்சியில் பேசிய பியூஷ் கோயல், “ஜிஎஸ்டியில் மேற்கொள்ளப்பட்டுள்ள இந்த சீர்திருத்தம் கடந்த 11 ஆண்டுகளில் எடுக்கப்பட்ட பல்வேறு நடவடிக்கைகளின் பின்பு வந்த முக்கிய தீர்மானமாகும். இது மருத்துவத் துறை, விவசாயம் மற்றும் சிறு, குறு தொழில்துறைகளில் பெரும் தாக்கத்தை ஏற்படுத்தும். அதேசமயம் நாட்டில் உள்ள ஒவ்வொரு நுகர்வோரும், தொழில்துறையினரும் பயன்பெற வேண்டியது அவசியம்,” என்றார்.
மேலும், “ஜிஎஸ்டி சீர்திருத்தம் ஒரு திருப்புமுனை. 2047ஆம் ஆண்டுக்குள் இந்தியா வளர்ந்த நாடாக மாறும் பயணத்தில், இந்த நடவடிக்கை முக்கிய பங்காற்றும். ஆகவே தொழில்துறையினர் இந்த சீர்திருத்தத்தின் பலன்களை மக்களுக்கும் சென்றடையச் செய்ய வேண்டும்,” என அவர் வலியுறுத்தினார்.
